11-16 ноябрьыште Йошкар-Олаште Курчак театрыште курчак театр-влакын «Яндар» тӱнямбал фестивальышт кокымшо гана эртаралтеш. Тушко Россий да Китай гыч 12 коллектив ушна.
Фестивальыште кугыжаныш веле огыл, частный театр-влакат мастарлыкыштым ончыктат. Мутлан, Санкт-Петербург гыч «Театр имени Кукол», Мытищи гыч «В гостях у Кузи» театр, кидшарчаш курчакым ыштымыж дене кумдан палыме Томск ола гыч «2+Ку» илыше курчак театр. Тыгак Санкт-Петербургысо «Театр у Нарвских ворот» йоча драмтеатр ушна, тудо курчак спектакль-влакымат шында.
«Курчак театр – чылалан» – тыгай девизше фестивальын. Садланак йоча-влакланат, кугыеҥ-шамычланат спектакль-влакым палемдыме. Екатеринбургысо курчак театр шке репертуарже гыч ик эн палыме постановко, Н.В.Гогольын кум произведенийже почеш шындыме «Гоголь. Триптих» спектакль, дене фестивальым почеш. А Волгоградысе курчак театр школысо классике – М.Ю.Лермонтовын «Мцыри» романтический поэмыж почеш шындыме – постановкым модеш.
Икымше гана Йошкар-Олашке Омск ола гыч «Арлекин» курчак, актёр да маске театр толеш: современный автор-влак Юрия Бурносова ден Татьяна Глущенкон книгашт почеш шындыме «Кот и Мурлик» спектакльым модыт.
Фестивальын организаторжо, Марий Элысе Курчак театр, эн изи, 10 тылзаш гыч 2 ияш марте, йоча-влаклан «Снег» спектакльым темла.
Посна уна семын Китай Калык Республик гыч труппо толеш. Тудо марионетке-курчак-влак дене «Colorfull puppet garden» спектакльым ончыкта, негызлан Хакка калыкын тӱвыражым налме.
Кажне спектакльым профессионал жюри акла: театровед Дина Давлетшина (Уфа) да курчак театр-влакын режиссёрышт, педагог-влак Эльмира Куриленко (Новосибирск) ден Николай Наумов (Санкт-Петербург).
