Кызыт интернет аланыште могай-гына кидпашалан огыт туныкто. Чытыш, моторлыкым шижын моштымо, кид лывыргылык веле лийышт. Южо пашам ончет да кузе шке кид дене тыгай чаплым ышташ лиеш манын ӧрат. Марий Турек посёлкышто илыше кидмастар Ольга Фатыхован курчакше-влак лач тыгай улыт: сылне, чатката, чапле .
Уста ӱдырамаш профессийже дене – педагог. Тудо МарГУ-м «Йот йылме-влакым да культурым туныктымо теорий да методике» специальность дене тунем пытарен. Тыгак писын лудмаш да ментальный арифметике специальностьла дене ешартыш шинчымашым налын. Кызыт Ольга йочасадыш да изирак класслаш коштшо йоча-шамыч дене занятийлам эртара.
Сай материал гыч – сай паша
Ольга изинек усталык шӱлышан кушкын. Советский район Вечын селасе школышто тунеммыж годым ешартыш образованийым пуышо педагог Валентина Григорьевна Сидыганова ден ИЗО-м туныктышо Людмила Витальевна Кукорева ӱдырлан творчествын тӱрлӧ видше, техникыже да йӧнжӧ-влак дене пылымым ыштеныт. Тидлан Ольга нунылан таушта.
Варажым Интернетыште оксам тӱлыдымӧ уроклам ончен, курчак-влакым ышташ тунемын. Тыге 2019 ийыште икымше курчакше шочын. Курчакым ыштымаште у технологийым кучылташ туныктымо ятыр урокым, мастер-классым ончен. Ольга ойла:
– Ик курчакым арняште, икмыняр тылзыште, эсогыл идалык жапыште ургаш лиеш. Но чон-кумыл паша деч посна вес сомылымат ыштыман. Яра жап, идей деч посна тӱрлӧ материал кӱлыт. Сандене мый тыге шонем: могай да кунам шочшаш – курчак шке пала. Тыгеат лиеда, южгунам шонен пыштыме образым илышыш пурташ ала-можо аптырата. Тунам пашамым ӧрдыжыш кодем. Икмыняр жап гыч угыч туддеке пӧртылам да кӱчык жапыште «чудо» шочеш. Кажне пашамым йӧратем да кумылем улмо годым веле ургем.
О.Фатыхова эн ончыч тыглай материал-влак дене курчакым ыштен. Кид лывыргымеке, сайрак качестван материалым кучылташ тӱҥалын.
– Шулдакан куэм гыч курчакым ыштыме годым вийым шуко пышташ логалеш гынат, паша садыгак кӱлеш семын моторын ок кой. Шергакан да сай материал-влак дене ургашат куанле, курчакшат сылныракла чучеш, – манеш кидмастар.
Курчакше – Китайыште
Ольган курчакше-влак, чынжымак, оҥай да шкешотан улыт. Арам огыл тудын пашаже-влак Марий Турек посёлкышто, Сызрань, Озаҥ, Моско, Санкт-Петербург, Благовещенск олалаште, эсогыл Китайыште эртаралтше выставкылаште ончыкталтыныт.
– Ӱмаште июньышто Китайысе Хейхе провинцийыште «Руш ял» китай да россий национальный илыш-йӱла паркыште Курчак-влакын балышт икымше гана эртаралтын. Тушто Российысе да Китайысе кукольник-влак шке пашаштым ончыктеныт. Мыят тиде балыште лийынам, – каласыш О.Фатыхова.
Йомак, пеледыш кумылаҥдат
Кидмастар ик жап курчакым ыштыме шотышто курсымат эртарынеже улмаш, но южо соцкылым чарымылан кӧра тиде шонымашым коден. Туге гынат, икмыняр гана мастер-классым ыштен. Йодмо почешат курчакым урга. Но тидым шуэн ышта, молан манаш гын, вашкаш ок йӧрате, чылажымат кумылым пыштен ышташ тырша. 
– Эн ончыч ушыштем образ шочеш, вара веле материал-влакым ойырем. Тидлан мыйын пеш шуко жап кая. Вара куэмым кӱлеш семын пӱчкын ямдылем, ургем, кӧргышкыжӧ холлофайберым шӱшкам, ужашлам ушен ургем. Тылеч посна вургемым да йолчиемым, аксессуар-влакым ыштем. Курчакым ончымаште темлымашым, фото да видеосессийым, упаковкым ямдылем. Тунам веле налше еҥлан ямде курчакым колтем, – ойла кидмастар.
Ольган мутшо почеш, усталык шӱлышан айдемым кеч-могай кырча-мырча кумылаҥда. Сылне кадыр, шӱртӧ пырче, куэмыште кружва ден пеледыш, йомакысе але фильмысе геройын образше, уремыште эртен кайыше еҥ, интернетысе сӱрет кидпашалан шӱмаҥдат.
Пашаже-влакым ВК-се https://vk.com/olenita_dolls группышто ончаш лиеш. Марий Турек посёлкысо В.П.Мосолов лӱмеш краеведений тоштерыште национальный костюман ныл пашаже аралалтеш.