Тӱрлеман марий вургем чинчын-вунчын волгалтмыж дене сӧрал. Тудын кеч иктаж еҥлан чикте, кеч курчаклан, шке тӱсшым да моторлыкшым огеш йомдаре. Изи пачкаталан да курчаклан вургемым ышташ утларак жап да моштымаш кӱлыт, шонем.
Йыванаул ялысе ансамбльыш коштам. Ятыр еҥлан ӱштым, ончылсакышым, ягам (ший аршашым), вуйыш сӧрастарыме настам ыштен пуэнам. Тыгак шовычыш, шонанпылан сӱретым ыштен, шер денат сылнештаренам, солыкымат шуко тӱрленам. Утларакшым Пермь кундем ден Екатеринбург ола гыч еҥ-влак ыштен пуаш йодыныт. Ош куэмеш тӱрлымӧ марий тувыремым Наталья Ябекова Москошто дизайнер Вячеслав Зайцевын лӱмгечышкыже мийыме годым ончыктен ыле.
Сумка ден шоперымат тӱрленам, тӱрлӧ аралтышымат ыштылынам. Уныкам-шамычым Урал марий вургемым ыштен чиктенам. Ик ияш уныкамат Ага-Пайремыш тудым чиен лектын ыле.
Спецопераций дечат ӧрдыжеш кодын омыл. Тушко бисер гыч 300 суксым ыштен колтенам. Ты кечылаште адак суксо-влакым ыштылам, – каласкалыш Людмила Петровна.
Мастар еҥ кеч-куштат мастар, маныт. Тыге Л.П.Шалкиева нергенат каласаш лиеш.
Эльвира Терентьева.
Фотом Л.Шалкиеван альбомжо гыч налме.
