Илышыште вашлиялтше ойыртемалтше тӱрлӧ случай нерген кугурак еҥ-влакын каласкалымыштым колышташ йӧратем. Ик илалше ӱдырамашын историйже дене тендамат палдарынем.
Авам заводышто пашам ыштен, пашадар олмеш тӱрлӧ шӱрашым, чыве шылым да моло кочкышым пуэденыт. Зина акам ден пелашыжат авам дене пырля заводышто тыршеныт. Нунын кум шочшышт лийын, эн изиже, Полина, ныл ияш. Кевытыште кочкаш наледаш оксашт уке, садлан Зина ака каныш кечылаште ярмиҥгаште чапле кемжым але моло тӱрлӧ сай вургемжым ужален. Адакшым изи Полинан шочмо кечыже лишемын. Ешын ны пӧлекым, ны тортым налаш оксаже лийын огыл.
Полинан шочмо кечыже визымше декабрьыште лийын. Кумшо декабрь – кугурак акажын колымо кечыже. Тудо вич ий ончыч рак дене черланен колен. Ты кече шуматкечылан логалын, садлан Зина ӱдыржын шӱгар ӱмбакыже миен толаш шонен пыштен.
Декабрь тӱҥалтыште 30 градус марте йӱштӧ шоген. Колышо-влак деке шÿгарлаш тыгай йӱштӧ кечыште коштмо сайлан огыл манмым пален гынат, ӱдырамаш тушко тарванен. Кече лекме деч ончыч шӱгарлаш миенат шуын. Ӱдыржӧ деке ошкедыме годым шукерте огыл тойымо еҥын шӱгарже шинчажлан пернен. Тудым У ий кож гай сӧрастарыме. «Еҥ-влакын ушышкышт мо гына ок тол» семынже шоналтен, лишкырак миен. Памятник олмеш тумбо шоген, шӱгар ӱмбалым пеледыш ден венок-влак сӧрастареныт. Тунам нуно моткоч шергакан лийыныт.
Фотографий гыч Зинам кок ӱппунеман ошалге ӱдыр ончен. Тудо кум кече ончыч колен. Ӱдырлан улыжат вич ий лийын. Зина ончыч тудым чаманен, но вара шӱгарже ӱмбалне шергакан пеледыш, конфет, венок-влакым ончен, чоныштыжо кӧраныме кумыл ылыжын. Тумбо воктене тыгак кок курчак ден пушкыдо маска шинченыт. Ик курчакше Зинам поснак сымыстарен, тудо марлан кайыше тувыран, шем кужу ӱпан, шинчаже чылт илыше еҥын гай лийын. Вуйжым фата сылнештарен.
Тунам Зина ушым йомдарыме гай лийын, курчакым налын да, колышо ӱдыр деч прощенийым йодде, чеверласыде куржын. Зина окса укелан, йоча-влаклан нимом налын кертдымыжлан шканже шке ӧпкелен.
Ончыч курчакым шӱгарла гыч налмыжлан лӱдынат, но Полина мотор модышым шочмо кечыжлан пӧлек шотеш вучен. Адакшым Зина кӱлеш-оккӱл шонымаш-влаклан ӱшанен огыл.
5 декабрьыште Зина Полинан эн йӧратыме тортшым кӱэштын, курчакым пӧлеклен. Ӱдыр пӧлеклан моткоч йывыртен. Тудын дене пырля мален, кочкын, йочасадышкат кондыштарен.
Тылзе эртымек, Полина нелын черланен. Кап температуржо 39 градус марте кӱзен. Тудо чӱчкыдын шортын, нюслен, курчакше йӱштӧ, тамлын огеш ӱпшӧ манын. Аваже курчак шотышто нимомат шекланен огыл. Полина арня наре орланен, курчак шотышто эреак вуйым шийын. Омышкыжо осал ӱдыр толеш, сай огыл мурым мура, курчакым поген налнеже манын ойлен аважлан.
Зина Полина дене больничныйыште лийын. Ӱдыржын малымыж годым шкежат нералтен колтен. Колышо ӱдыр, мурым мурен, нунын пачерышкышт толын. Тудын шинчаже осал, изи йочалан келшыше лийын огыл. Ӱдыр Зинам, вара Полинам тӱткын ончен. Ӱдырамаш трукышто помыжалтын, Полинан кидше гыч курчакым налын, шӱгарлаш кудалын. Колышо изи ӱдырын шӱгар ӱмбалныже Зина мӱгырен шортын, сукалтен шинчын проститлаш йодын. Курчакым верышкыже шынден.
Полинан температуржо эрлашымак волен, курчакын йоммыжлан чот шортын гынат, жап эртымеке, тудын нерген монден. Тылеч вара ӱдыр тӧрланен, да тудлан уда омо-влак тетла кончен огытыл.
Мира.
Йошкар-Ола.