Козьмодемьянскыште лийме годым А.В.Муравьёв лӱмеш Купеч быт пӧртыш пурен лекна.
Тыште тоштерым 1995 ийыште почмо. Тыгай инициативе дене музей-заповедникын директоржо Арнольд Муравьёв лектын. Ондак тудо мебель мастарлык пӧрт маналтын, 2002 ий годсек – Купеч быт пӧрт. Вуйлатыше шке пашаеҥже-влак дене пырля шымлыме, экспонат-влакым погымо да тидым калыклан палдарыме пашам шуктен. Козьмодемьянскыште илыше-влак тоштерлан XIX курым мучаш ден XX курым тӱҥалтыш жапысе илыш-йӱла дене кылдалтше ятыр арверым, мебельым, кӱмыж-совлам, вургемым, йолчиемым, документым, книгам, оксам конденыт.
Ты пӧртым эше 1897 ийыштак чоҥымо. Эн ончыч тыште купеч-лесопромышленник А.И.Шишокин илен. Вара тудо йорлештын, а пӧртшым ужалыме. Тыште Губинмыт илаш тӱҥалыныт. Варажым РКП(б)н уездный да ВЛКСМ-ын комитетышт, газет редакций верланеныт.
Купечын пӧртшым тоштерыш савырыме дене тудо сылнырак тӱсым налын. Мезонинан, антресолян, цокольный пачашан пӧрт тачат торашке волгалтеш.
