Вучымо шокшо толын гынат, вӱдыш пураш эше эр. Йӱштылмӧ тургым республикыштына 1 июньышто гына почылтеш.
Вӱд эше йӱштырак, йӱштылаш келыштарыме вер-влакым тӱрыснек шотыш кондымо огыл. Йӱштылмӧ тургымым почаш вӱдын температурыжым висат. Вӱд +20… +22°С деч шокшырак лийшаш. Изи Какшан эҥерыште, мутлан, кызыт +10 градус шокшо наре гына.
Пляжлаште паша шолеш: водолаз-влак вӱд йымалым эрыктат, специалист-влак вӱдын пробыжым налыт, утарыше пост-влакым келыштарат.
Икмыняр правилым шотыш налман:
- Йӱштылаш чарыше да йӱштылаш келыштарыдыме верлаште вӱд деке ида лишем.
- Вӱдыш йӱшӧ ида пуро.
- Вӱдыш кӱвар гыч але тидлан келыштарыдыме вер гыч ида тӧрштыл.
- Оҥа, пырня, машина камер, пуэн овартыме матрац деч шекланыза.
- Еҥ-влакын тӱшкан каныме верлашке янлыкым пелен налаш ок лий.
Йошкар-Олаште йӱштылмӧ тургым 15 август марте шуйна.