Васильев урем
Ты урем Йошкар-Ола да Медведево посёлко чекыште верланен. Тудо 1983 ийыштак шочын гынат, пытартыш 15 ийыште веле утларак кумдаҥын. Ончыч тудым пустаҥше ола тӱрлан шотленыт, кызыт Йошкар-Олан ик современный районжылан шотлалтеш. Тыште шуко пачашан ятыр у пӧртым нӧлтымӧ, кевыт, йоча-влаклан шуаралташышт тӱрлӧ частный школым, медицине рӱдерым келыштарыме. Васильев урем тӱҥалтышым Строитель урем деч налеш да Ян Крастынь урем марте шуйна.
Уремым марий учёный-йылмызе, писатель, марий лингвистикылан, этнографийлан, музыковеденийлан негызым пыштыше Валериан Михайлович Васильев (1883-1961) лӱмеш пуымо.