Шӱргыял школышто специальный военный операцийыште вуйым пыштыше кок марий салтак Евгений Владимирович Павлов ден Алексей Эдуардович Игнатьев лӱмеш Геройын Партшым октябрь мучаште почынна.
Кинер кундемна гыч 23 салтак спецоперацийыш Шочмо элым аралаш каен, нунын кокла гыч вич рвезе илыш дене чеверласен.
Евгений Павлов ден Алексей Игнатьев коктынат Шӱргыял школышто шинчымашым налыныт. Тӱрлӧ таҥасымаште школнан чапшым араленыт. Геройын Партшым почмашке нунын пӱтынь ешышт, ятыр родо-тукымышт толыныт. Ачаштлан Партым почаш ӱшанышна, авашт нине Парт-влак коклаш икымше тунемше семын шинчыч. Салтак-влакын пелашышт, Татьяна ден Тамара, пайремым эртарымашке кугу надырым пыштеныт. Шке пелашышт нерген пӱтынь материалым ямдыленыт. Алексейын аваже Валентина Георгиевна эргыжлан пӧлеклыме шке серыме «Россий салтак» почеламутшым йоҥгалтарыш.
Шерге ача-ава-влак, ме тендан патыр эргыда-шамыч дене моткоч кугешнена. Ме ӱшанена: Евгений ден Алексейын тыныс илыш верч Геройла вуйым пыштымышт арам огеш лий, сеҥымаш мемнан лиеш!
Елена Григорьева, Шӱргыял школын вожатыйже.
Снимкыште: Шӱргыял школышто Е.В.Павлов ден А.Э.Игнатьев лӱмеш Геройын Партшым почмо годым салтак-влакын ешышт да родо-тукымышт.
