Тений 6 июльышто Волжск ола 85 ияш лӱмгечыжым палемдыш. Ты жапыште Лопатино изи пашазе посёлко гыч олашке да Марий Элын промышленный рӱдерышкыже савырнен.
Тыште ола кумдыкым тӱзатат, социальный объект-влак чоҥалтыт да калыкын илыме условийышт саемеш. 2017 ий годсек Волжскышто «Формирование комфортной городской среды» федеральный проект почеш тӱрлӧ сомыл шукталтеш.
Ты жапыште калык коштмо 8 кумдыкым, изи сад ден йолешке-влакын коштмо верыштым уэмдыме. 20 утла кудывечым сылнештарыме. 30 утла йоча площадкым келыштарыме. Сеҥымаш паркыште Шарнымаш пырдыжым ыштыме.
2025 ийыште «Машиностроитель» микрорайонышто изи садым ачалат. А вес ийын Орлов урем гыч Руш Луговой урем марте волгалтараш палемдыме.
Российысе грант конкурслаште сеҥыме почеш олмыктымо: 2021 ийыште – «Дубовая роща» паркым (80,2 млн теҥге), 2023 ийыште – Рӱдӧ площадьым (100,9 млн теҥге). Тений «Ре-паркым» уэмдат, тидлан 97,6 млн теҥге ойыралтын.
Социально-кӱлешан объект-влак коклаште у Аза пӧртым почмым палемдыман. Тыгак ятыр жап нелылыкым шочыктышо йодышым решатлыме: «Родина» кинотеатрым ачалыме да ты верыште Йоча сымыктыш школым почаш палемдыме. Кызыт тушан оборудований ден семӱзгар-влакым наледат.
Илыме вер шотышто:
– 1000 утла еҥым аварийный пӧртла гыч кусарыме;
– тулык йоча-влаклан 50 утла пачерым пуымо;
– 2022 ий гыч 18 пӧртым капитально олмыктымо.
Образований сферыште:
– 4-ше номеран школым ачалыме;
– кызыт Волжскысо лицейым да 3-шо номеран «Орлёнок» йочасадым олмыктат;
– «Машиностроитель» микрорайонышто 825 веран у школым чоҥаш палемдыме. Проектно-сметный документаций ямде. Лишыл жапыште конкурс процедур тӱҥалеш.
Чыла ты сомыл Волжск олаште илыше-влакын полышыштлан кӧра шукталтын. Ончыкыжымат нунын, Марий Эл Правительствын да Волжск оласе мэрийын пырля пашам ыштымышт дене ола утыр тӱзланышаш.