Шукерте огыл регионысо парламент Кужэҥер кундемын Кульшит ялжым ял-влак списке гыч кораҥдаш пунчалым луктын.
Молгунам тыгай яллам пытартыш еҥын кайымыж деч вара веле пытыше яллан шотленыт, но Кульшит изи гынат, илаш йӧршӧ яллан шотлалтын. Чыла тиде сомыл калыкын инициативыж почешак шукталтын. Да Кульшит ял урем лӱм дене пошкудо Аганур ялыш ушнен. Ты ялыште газ улмылан кӧра ынде изи Кульшит ялышкат газым пурташ йӧн лектын кертеш.