2-3 октябрьыште Екатеринбургышто тӱнямбал «EXPOTRAVEL» туристический ончер эрта.
Марий Эл Республик нерген ты мероприятийыште туризмым вияҥдыме шотышто регионысо агентствын еҥже-шамыч палдарат. Тушто туристско-информационный рӱдерын, «Нельсон» туристический агентствын, мурышо да куштышо «Эрвел марий» калык ансамбльын, «Деревянное государство» конструктор-влакым шочыктышо Кирилл Милютин, амалкалче Кладимир Аптулаев да волонтёр-влак пашам ыштат.
Ончерыш толшо уна-шамычым кундемнан поян тӱвыраж да йӱлаж дене палдарат. Тыгак республикыштына ыштыме сувенир сатум нунылан темлат. Ты мероприятий Марий Элысе туристический сатум тӱжвал рынкыш лукташ полшымо шонымаш дене эртаралтеш. Тудо «Туризм и гостеприимство» нацпроект почеш илышыш шыҥдаралтеш.