1-7 мартыште Сочи оласе «Сириус» кумдыкышто Самырык-влакын тӱнямбал фестивальышт эртаралтын. Тушко тӱрлӧ эл гыч 20 тӱжем наре еҥ: образований да науко, тӱнямбал кыл, тӱвыра, порылыкым ончыктымо да волонтёр паша, спорт, бизнес, медиа аланласе самырык лидер-влак – ушненыт. Марий Эл гычат фестивальыш 70 наре участник ден 25 волонтёр миен. Нунын кокла гыч иктыже – МарГУ-што тунемше Валентина Евсеева.
Туныктышо лийнеже
Валя Морко район Унчо села гыч. Кум шочшан ешыште икшыве-влакым изинек пашаче лияш, икте-весым пагалаш, илышыште тӱрлӧ йӧным кучылт мошташ туныктеныт. Школышто ӱдыр сайын тунемын, вес семынже лийынжат кертын огыл, вет тудын аваже Римма Камильевна селасе школышто руш йылме ден литературым туныкта. Валя школышто эртаралтше тӱрлӧ мероприятийышкат кумылын ушнен.
Кызыт ӱдыр МарГУ-што национальный тӱвыра да тӱвыра кокласе коммуникаций институтышто нылымше курсышто тунемеш. Аваж семын школышто пашам ышташ изинек шонен, садлан марий йылме ден литератур, англичан йылмым туныктышо лияш ямдылалтеш. Студентке университет илышышкат чолган ушна: икымше курс гычак «Голос юности», «Студвесна» да моло мероприятийыште шкенжым чолган ончыкта.
Фестивальыште кӱслем шоктен
– Самырык-влакын тӱнямбал фестивальышт нерген кураторна деч пален налынам. Тудо фестиваль нерген каласкалыш, мом ышташ кӱлмӧ нерген ойлыш. Шуко шонкалыде, тушко ушнаш кӧнышым. Фестиваль годым ме Марий Эллан пӧлеклалтше стендыште шочмо кундемна нерген моло-влакым палдаренна. Марий тӱвыра, йӱлана-влак нерген каласкаленна, тӱрлӧ модыш дене модыктенна, марий тӱр, калык семӱзгар дене палымым ыштенна. Университетыш тунемаш пурымекем, Йошкар-Оласе Бауман лицейыш кӱсле дене шокташ тунемаш коштынам. Фестивальыште тиде моштымашем лачак кӱлеш лийын. Стендыште эр гыч кас марте лияш логалын. Яра жап годым Сочи олан сӧрал верлажым ончен коштынна. Тиде олаш икымше гана миенам, моткоч келшен. Еҥ-влак поро кумылан улыт, йодмылан уло кумылын полшат, вашештат, – каласкала В.Евсеева.
Фестиваль гыч Валя нӧлталтше кумылан пӧртылын. Ончыкыжымат тыгай сынан мероприятийыш ушнаш кумылжо лектын. Тудын палдарымыж почеш, тыге у олам ужаш, у еҥ-влак дене палыме лияш йӧн пуалтеш, илыш умылымашет вашталтеш.
Весела да поро кумылан, чыным йӧратыше ӱдыр ончыкыжым чонлан келшыше профессийыште тыршаш да тӱрлӧ элым ужаш шона. Самырык еҥын чылажат тек шонымыж семынак лиеш.
В.Евсееван альбомжо гыч налме фото.