Кумыл уло.  Йӧн лектеш

Татьяна Мамева изи да мотор ялыште – Шернур район Ондроп почингаште шочын-кушкын. Кызыт тудо Йошкар-Олаште ила. Таня  школыштак чолга лийын. Кызытат эре тунемеш, эре уым кычалеш.Индешымше класс марте Коклала школышто тунемын. Ятыр конкурсышто, мероприятийыште шке вийжым терген, пырдыжгазетым ямдылыме паша эре тудын кидыште лийын. Районысо пырдыжгазет конкурсышто чӱчкыдын сеҥыше лийыныт.

– Мый самырык-влакын «Эр Вий» республиканский организацийыштын эртарыме конкурсышто вием тергенам. Тудым Маргарита Маланова вуйлата. Районысо этапыште сеҥыше-влакым «Сергеевка» палаточный лагерьыш ӱжыныт. Ты лагерь Медведево районышто лийын. Тушко школысо делегаций дене кок ий почела коштынна.  Очыни, туштак вожылмым, лӱдмым чарненам, — манеш Таня.

Школ деч вара политехысе «Управлений да право» факультетыште шинчымашым поген.  Туддеч вара шуко вере пашам ыштен ончен.

 Ик верыште пашам ышташ ом йӧрате. Университетым тунем лекмеке, шым вере пашам ыштен онченам. Икымше – «Тепличное» ОАО. Олаште кодаш манын гына тушко  пашаш пуренам. Туштак шке специальностьем дене паша верым кычалынам. Тылеч вара шылым перерабатыватлыме организацийыште экономистлан ыштенам. Тунемме пагыт годсек кадр пӧлкаште пашам ыштымем шуын. Кадр пашаеҥлан вер лекмеке, вигак тушко куснаш шонен пыштенам, но ты должностьыш кусарыме деч ончыч вуйлатыше мыйым чот терген. Тылеч вара Сбербанкыште, «Универсал», «Агроторг»  фирмылаште да моло вереат пашам ыштенам. Кызыт «Мегафон» компанийын регионысо пӧлкаштыже улам, — ойла Т.Мамаева.

 Тый эре тунемат, уш-акылет пойдарет. Ала адак у шонымашет уло?

 Кок ий ончыч ик федеральный компанийыште собеседованийым эртенам. Нижний Новгород олаш илаш куснаш шонымашат лийын.  Тушеч мылам заданий-влакым колтеныт. Нуно неле лийыныт. Тунам компанийын йодмашыжлан келшыше, чыла ыштен моштышо, еҥ-влак дене кылым ыштен моштышо, кугу опытан лийман манын умыленам. Тылеч вара шуко лудаш, тунемаш тӱҥалынам.

Шукерте огыл «Мама – предприниматель» курсыш коштынам. Тунамак сайтым ыштыме курсышто тунемынам.

Пытартыш жапыште фрилансер паша мылам келша. Тиде – интернет-предпринимательын полышкалышыже. Тыгай йӧн дене мӧҥгыштат пашам шукташ лиеш. Мутлан, сайтым ышташ, тудым телефонлан келыштараш, вебинарым эртараш, интернетыште рекламым вераҥдаҥдаш лиеш. Чыла тидым мыят ыштем.

 Кузе чыла шуктет?  Могай секретет уло?

 Мыйын кугу книгам уло. Тушко мый кажне кечым, кажне шагатым возем. Чылажат план почеш ышталтеш. Эрдене срочный паша-влакым ыштем, жап лектеш гын, тунеммашлан ойырем. Тыгай жапым ом му гын, корнышто, машинаште  вебинарым колыштам, книгам лудам. 

Кызыт 80% жапем паша налеш, сандене лишыл жапыште паша гыч каяш да шке шонымашем илышыш пурташ шонем. Тидлан шуко тунемам, рекламым ыштем, семинарыш коштам. Ӱшанем: вашке еҥлан огыл, а шканем пашам ышташ тӱҥалам.

 Тӱҥжӧ – кумыл лийже, а йӧн лектеш! А Танян кумылжо уло, шонымашыже шуко, йӧным муэш. Тугеже пашаже вораҥеш.