Ялыште илыше марий ӱдырамаш могай манын йодмылан мом вашешташ лиеш? Пашам йӧратыше, поро кумылан, пошкудо-влакым пагалыше. Морко район Арын селаште илыше В.В.Павлова нергенат тыгак ойлаш лиеш. Валентина Васильевнам пошкудыжо-влак пагалат, уремыште вашлийме годым саламлалтыт, мутланат.
Бухгалтер гыч – клубым вуйлатыше марте
Валентина Васильевна – Кужэҥер район Топкавлак ялын ӱдыржӧ. Йошкар-Оласе строительный техникумым бухгалтерлан тунем лектын, ик каныме базыште пашам ыштен. А вара илыш корно тудым Морко район Арын селаш конден – 1989 ийыште Владислав Анатольевичлан марлан толын.
– 1990-ше ийлаште куштылго огыл ыле. Шке профессиемлан келшыше паша вер лийын огыл. Арын школышто поварлан ышташ темленыт, мый келшенам. Икшыве-влак шочмеке, верысе администрацийыште бухгалтерлан паша вер лекте. Тушто шым ий наре тыршенам. Кок ий почтальонкылан коштынам. Почтышто пашам ыштымем годым пошкудо Чодыраял клубышто вуйлатыше уке ыле. Тыге мый клуб вуйлатышылан шогальым.
Тунам Чодыраял клубышто илыш шолын. Тӱрлӧ мероприятий чӱчкыдын эртаралтын, каныш кечылан самырык-влак дискотекыш погыненыт. Кеҥежым калык поснак шуко толын. Пашам келшен, но пеш ноялтеш ыле. Садлан икмыняр ий гыч тушеч кайышым, – каласкала В.В.Павлова.
Тылеч вара Валентина Васильевна кевытыш ужалышылан пашаш пурен. А тений январь гыч уэш клуб вуйлатышылан ышташ тӱҥалын. Клуб пеленысе «Тӱрлемӱдыр» студийын мастарже-влакат тудым пашаш уэш толаш ӱжыныт. Ик тылзе наре шонкалымеке, В.Павлова пашаш лекташ келшен. Пашадарлан кӧра огыл, ялысе клуб яра ынже шого манын.
Клуб вуйлатыше семын Валентина Васильевна Арын школ дене пеҥгыде кылым куча, ятыр мероприятийым пырля эртарат. Эрдене пашаш толмыж годымат В.В.Павлова ончыч школыш пурен лектеш, иктаж йодышым рашемда. «Тӱрлемӱдыр» студийыш пурен саламлалтеш, ончыкылык мероприятий шотышто кутырат. Вара шке паша верышкыже толеш. Компьютер ончылно ятыр жапым эртарашыже перна, документ-влак дене пашам ыштыман. Кечывалым ыштен ок шукто гын, паша сомылжо дене мӧҥгыштыжат шинчылтеш.
– Клубышто мероприятий-влакым школышто тунемше да туныктышо-влак дене пырля чӱчкыдын ямдылена, сценке-влакым шындена, изирак концертым ончыктена, спорт сынан таҥасымаш-влак эртаралтыт. Ончыч калык клубыш куанен коштын, залыште яра вер лийын огыл. Пандемий годым илыш вашталте. Кызыт уэш кошташ тӱҥалыныт.
Сад-пакча паша дене кылдалтше кружокна уло, вӱдышыжӧ – Людмила Васильевна Романова. Тудо ончыч школышто туныктен, кызыт – сулен налме канышыште. Кунам да могай нӧшмым ӱдымӧ шотышто планым ышта, меат, ты кружокыш коштшо ӱдырамаш-влак, тудын планже почеш ышташ тыршена. Пареҥгым кузе чын шындыман, шоганым да моло пакчасаскам тӱрлӧ копшаҥге деч кузе аралыман да молымат кружокышто пален налына. Могай росотам кунам кусарыман – чыла шотыштат Людмила Васильевна каҥаш дене полша. Пырля погынен, чайым йӱын мутланен шинчена, чоным почына, – манеш клубым вуйлатыше.
Мӧҥгыштат паша ятыр
Валентина Васильевна – кок икшыван ава да кум уныкан кова, йӧратыме пелаш. Владислав Анатольевич «Акашево» чыве фабрикыш пашаш коштеш. Алёна ӱдырышт ешыж дене Йошкар-Олаште ила. Анатолий эргышт ешым эше поген огыл. Йӱдвел кундемыште вахте дене пашам ышта.
Кеҥежым уныка-влак каникуллан толыт. В.Павловалан пакчаште жапым эртараш келша. Пакчасаскам веле огыл, тӱрлӧ пеледышым шындылеш – кажне ӱдырамаш моторлыкым йӧрата! Пӧрт окна ончылныжат кеҥежше-телыже пеледыш эре пеледеш.
Вольык пашаланат жапым ойыра. Павловмыт ушкалым, шорыкым ашнат. Кеҥежым отпуск жапыштат озавате канен шинчылташ ок ярсе. Вольыклан шудым ямдылыман, пакчасаскам телылан банкылаш оптыман. Туге гынат илышыжлан Валентина Васильевна вуйым ок ший, вет тудо изинек пашам йӧратен кушкын.
– Селаштына калык пеш поро, ваш келшен илена. Чаманен каласыман, самырык-влак шагалын улыт. Школым тунем лектын, олаш каят, мӧҥгеш пӧртылаш кумылышт уке. Клубышто мый денем пырля кеч ик самырык еҥ ышта гын, кажне кечын пашаш эшеат куанен коштам ыле, – ойла В.Павлова.
Валентина Васильевна семын шонышо, шке калыкше да вершӧржӧ верч чон йӱлен тыршыше еҥ-влак тек шукырак лийыт. Тунам ялын ончыкылыкшо верч тургыжланаш ок логал.
Еш альбом гыч налме фото-влак.