1-12 октябрьыште Э.Сапаев лӱмеш опер да балет театрыште А.Эшпай лӱмеш III оперный сымыктыш фестиваль эртаралтеш.
Фестивальым Р.Леонкаваллон «Паяцы» опержын премьерже дене почмо. Тудым режиссёр Степан Пектеев шынден. Оперым эше 7 октябрьыште ончаш лиеш.
3 октябрьыште «Аида» опер ончыкталте. Тушто Михайловский театрын (Санкт-Петербург) солистше-влак Мария Литке (Аида) ден Александр Безруков (Рамфис) мурышт. Радамесын рольжым Моско гыч Антон Иванов чаплын келыштарыш.
Таче «Кармен» опер лиеш, 9 октябрьыште – «Риголетто», а 12 октябрьыште – «Евгений Онегин». Чылаштыжат элнан лӱмлӧ театрлаж гыч солист-влак выступатлат.
Эльвира Терентьеван фотожо.