Шукерте огыл Россий Правительстве председательын алмаштышыже М.Хуснуллин ден РФ-н чоҥымо паша да ЖКХ министрже И.Файзуллинын вуйлатымышт почеш видеоконференций эртаралтын.
Тушто 2022-2023 ийлаште инфраструктурный бюджетный кредит дене проект-влакым илышыш шыҥдарыме шотышто каҥашыме. Тышке Марий Элым вуйлатыше А.Евстифееват ушнен.
Марий Элыште тыгай направлений дене кум объект чоҥалтеш. Медведево посёлкышто Сеҥымашын 75 ияш лӱмгечыже бульварым да Медведево посёлко ден Йошкар-Ола коклаште Черняков уремыште каныме зоным 2023 ий 30 июнь марте ыштен шуктышаш улыт.
Кумшо объект – Йошкар-Оласе аэропортын пассажир терминалже. Тудын проектно-сметный документацийжын кугыжаныш экспертизыжым сайлан шотлымо. Чоҥымо да монтажым ыштыме паша шотышто аукционым увертарыме, контрактым 20 апрель марте ямдылаш палемдыме.
Терминал 2024 ийыште пашам ышташ тӱҥалшаш. Тушто ик шагатыште 400 пассажирым обслуживатлыше аэровокзал комплексым ыштат, воктеныже кумдыкым сӧрастарат, аэродромым печен налыт; шокшым, вӱдым да тулым пуышо, тыгак связь сеть-влакым, бытовой да йӱр вӱдым погышо канализаций-влакым ыштат.
Умбакыже -«КУГАРНЯ» газетыште. 2022 ий, 1 апрель.