Марий самырык театрыш ты тургымышто пашам ышташ куд самырык актёр толын. Нунын коклаште Килемар гыч Иван Ганичев ден Волжск ола гыч Динар Сергеев мастарлыкым тапташ кугун тыршымышт дене ойыртемалтыт.
Самырык-влаклан тӱҥ рольымат ӱшанен пуат. Актёр-влак икмыняр режиссёр – С.Акчурина, Т.Лядова, О.Иркабаев, Э.Гордеева, А.Типикин – дене пашам ыштен шуктеныт. Чыла тидын нерген рвезе-шамыч дене вашлийын мутланышым.
Икымше тургым
– Иван, икымше тургым пашам ыштеда. Молан тунем шуктышда?
– Ме, Палантай лӱмеш тӱвыра да сымыктыш колледжын «Актёр сымыктыш» отделенийжым тунем лекме деч вара театрыш вигак толшо-влак, у сомылышко писын кычкалтна. Ала-молан посна тунемынна манаш огеш лий. Кажне паша мыланна у да ойыртемалтше.
Эн ончычак режиссёр Татьяна Лядован Дон Нигрон пьесыж почеш шындыме «Звериные истории» спектакль дене пашам ышташ тӱҥална. Тудо Озаҥысе театральный училищыште студент-влак дене тырша. Кызыт икымше курсын вуйлатышыже.
Тиде спектакль мыланна да, шонем, Марий самырык театрын историйыштыжат икымше, драмедий (драме ден комедий иктеш) жанр дене шындыме постановко. Пашана моткоч оҥайын лектын.
Ик тылзе наре репетиций лиймеке, икмыняр тренингым эртымеке, спектакльым калык ончыко лукнат. Варажым мемнам театрыште ончыкталтше я ик, я вес спектакльышке пурташ тӱҥальыч. Куштылгак лийын огыл. Вет моло опытан артист-влак чыланат мом ыштышашым паленыт, а мемнам пырысиге семын тушко пуртен колтеныт, текстым пуэныт да «пашам ыште» маныныт. Но коллектив сай, мыланна эре полшеныт, сандене шкенан рольна-влакым модаш тӱҥална.
У пашаеҥлан шуко опытым погаш логалеш. Мутлан, кӱлеш годым кок-кум репетицийыште кужу текстымат шарнаш тунемат.
– Динар, а тыйын икымше паша идалыкет мо дене ойыртемалтеш?
– Тургым сайынак эрта. Ролят погына веле. Ме колледжыште ик пашам кужун репетироватленна, вара шынденна. А кызыт пеш шуко спектакльыш мыйым пуртеныт. Тидыже шкешотан дренаж семынак, тидлан кӧра практикыште шуко опытым погена. Моткоч оҥай, кунам эше тӱҥ рольым пуат. Мутлан, «Капитанская дочка» спектакльыште кужу текст да шуко монолог улыт. Но тунемман, ыштыман – тидыже йокрокланаш ок пу.
Профессионал-влак дене пашам ышташ тунемам. Южгунам лӱдамат, но тыршем, шкемым кӱлеш семынак ончыктем. Театрыште ондак шындыме спектакльысе рольым пуат гын, писын тунемам.
УМБАКЫЖЕ — «Кугарня» газетыште (20-24 и1 12 апрель).