Тений 11-12 январьыште «Шӱдыр» йоча ансамбль да тудын вуйлатышыже Ирина Кошкина Москошко миен коштыныт.
Киров кундем Малмыж район Кугу Кетек тӱвыра пӧрт пелен кугыеҥ-влакын «Кетек вел» да йоча-влакын «Шӱдыр» ден «Шонанпыл» коллективышт пашам ыштат. Кумытшымат И.А.Кошкина вуйлата.
Москошто, «Измайлово» концерт залыште, ансамбльын участникше-влак йоча, самырык да кугыеҥ-влакын сценический да художественный искусствышт шотышто всероссийский конкурс-фестивальыште да «Ярмарка культур» национальный культур да фольклор тӱнямбал конкурсышто шке мастарлыкыштым ончыктеныт.
«Ме Москош каяш оксам шке погенна, йоча-влакын ача-авашт да моло кумылан еҥ-влакат полшеныт. Коллектив гыч кандаш икшыве да мый корныш тарванышна. Корно роскот деч посна кажне выступленийлан 950 теҥгем тӱленна. Йоча-влак Москош миен толмыштлан моткоч куаненыт. Вет шукынжо поезд дене икымше гана каеныт. Ик кечыште ме ятыр вере лийна: метро дене кудалыштна, Йошкар площадьыште коштна, ятыр вере фотографироватлалтна», – каласыш ансамбльым вуйлатыше Ирина Анатольевна.
Конкурслаште 80 наре коллектив выступатлен. Виче кундемысе участник-влак всероссийский ден тӱнямбал конкурсыштат Шернур марий-влакын сӱан куштымашыштым да Киров марий-влакын куштымашыштым ончыктеныт. «Шӱдыр» ансамбльын номерже-влакым жюри кӱкшын аклен, кок конкурсыштыжат икымше степенян лауреат лӱм дене саламлен. Ансамбльым шочыктышо да тудым вуйлатыше Ирина Кошкиналан «За сохранение национальных традиций» дипломым кучыктеныт. Тыгай наградым художественный вуйлатыше-влак кокла гыч тудлан да Бурятийысе ик коллективым вуйлатышылан гына пуэныт. Тыге марий участник-влак элнан рӱдолаж гыч кум кубокым, кум дипломым, тауштымашан серышым, пӧлекым конденыт. Тыгак кажне участниклан кок медаль логалын. Теве могай молодец улыт!
Эльвира Терентьева.