7-13 июльышто Санкт-Петербургышто «Мисс и Миссис Великая Русь» Российысе моторлык ден талант конкурсышто Марий Элын чапшым 36 ияш Екатерина Мишакова арален да кум титул дене палемдалтын: «Великая Русь» конкурсын III вице-миссше, «Юл кундемысе округын королевыже» да «Калык йӱклымаш» номинацийлаште. Кум короно тудлан веле пуалтын.
Кайыме корно
Екатерина Курыкмарий район Виловат селаште шочын-кушкын. Ачаже газ службышто слесарьлан пашам ышта, аваже – Виловат кевытыште ужалышылан (тылеч ончыч «Марпотребсоюзышто» товаровед лийын). Ешыште кок ийлан изирак шольыж дене пырля кушкын. Катя, аваж семын товаровед лияш шонен, Чебоксарысе кооперативный институтыш тунемаш пурен.
Вара пӱрымаш тудым Данийыш наҥгаен. Ты эл дене ыштыме ойпидыш почеш кок ий тушто илен, англичан ден датский йылмылам тунемын.
2014 ийыште йотэл гыч пӧртылын да 2015 ий годсек Москошто ила. Эн ончыч ик финн компанийыште менеджерлан шым ий пашам ыштен. Тушто ужалыме шотышто директор марте кушкын. СВО тӱҥалмеке, саде компаний гыч каен да Турцийысе «Альберт Генау» компанийын Российысе филиалышкыже пурен, кызыт – тудын гендиректоржо.
Модель лиймыже шуын
Изиж годымак Катя «Модель лийшаш да модель-влакын школыштышт тунемшаш ыле» манын шонкален. Тений майыште школыш тунемаш пурен, а июльышто конкурсыш ушнен.
– Ийготем деч ӧрын омыл, шке шонымашышкем шуынам. Ондак модельла коят манынат ойленыт… Йылме-влакым паленам да нуным кучылташ кӱлмым шижынам. Чӱчкыдынак финн мландышке чоҥештылынам, сай паша опытым погенам.
Эше студент улмем годым Суомишке мӧр погаш кудалыштынам. Тунамак англичан йылмым тунемаш йӧн нерген шоненам да вуз деч вара ик агентствыш кеч-могай йотэлыште пашам кычалме шотышто йодмашым коденам. Мылам Даний логалын. Йылме-влакым писын тунемынам. Тидлан кӧра ынде кушто шонем, тушто пашам ыштен да шуаралтын кертам, путешествоватлем, – каласкала участнице.
Школышто тунеммыж годымат Екатерина ик гана моторлык конкурсыш ушнен улмаш. Тунам кумшо верым налын.
Параплан, парус спорт
Е.Мишакова шке яра жапшым спортлан ойыра. Тудо параплан дене чоҥештылаш тунем шуын, Российыште, Турцийыште, моло элыштат, тыгак шочмо Курыкмарий районысо Аламнер курыкыштат чоҥештыл ончен.
Кодшо ийыште спортын вес видше денат кӱкшытыш шуын: парус суднын тӱнямбал кӱкшытысӧ шкипержылан (суднын капитанже) лицензийым налын. Ынде парус-влак йымалне мардеж ваштарешат шкетынак ийын каен кертеш. Тидын дене землячкына путырак кугешна.
Тылеч посна куржталыштеш, поснак курыклаште вийжым терга. Карачаево-Черкессийысе Архыз кундемысе курыкласе 3300 метр кӱкшытыш кӱзен, 48 километрым эртен. Тыгак Дагестаныште 1900 метр кӱкшытыштӧ лийын, 35 меҥгым каен.
Екатерина тидын нерген тыге мане:
– Кажне кечын тренировкыш лектам. Тиде мыланем куштылгылыкым, эрыкым пуа да тазалыкым пеҥгыдемдаш полша. А парус-шамыч илышын волгыдо тӱсшыла дене палдарат, илем да пиалан улам манмым пеҥгыдемдат. Мый нигунамат иктымат ом вучо, ом йод – мом шонем, тудым куштылгын шуктем. Шке йыремат тыгай еҥ-влакым чумырем, кӧмыт каласен кертыт: «Катя, мый тылат ӱшанем, мый тый денет пырля каем!»
Ӱдырамаш улмым ончыкташ
Тыгай кӱкшытыш шумыж нерген Е.Мишакова уло кумылын каласкалыш:
– Конкурсыш молан ушненам? Мый гендиректор улам, вачӱмбакем кугу нелыт возын, пӧръеҥ позицийыште тыршем. Сандене шкемым, ныжылгыкемым ончыктымем да ӱдырамаш семын пушкыдырак лиймем шуын, вет мыят ты тӱняште шке моторлыкем да шыргыжалмем дене волгыдым шарем.
Тӱрлӧ кундем гыч 50 участник лийын. Нуно регионысо моторлык конкурслаште сеҥеныт. А мыйым вигак финалыш ӱжыныт – тидлан чот куаненам. Тугеже тыгай таҥасымашыш ушнаш келшен толам.
Ямдылалташ майыштак тӱҥалынам. Куд образым шоныман ыле. Тематикыжым ойленыт: «Я расскажу тебе сказку». Южо ӱдыр «Царевна-лягушкат» лийын, а мый «Варвара-красам» ойырен налынам. Тиде героине семынак ю шӱлышан улам: мом шонен пыштем, тудым шуктем, виян лияш ом лӱд.
Мо оҥайже: унагудысо номерыш Урал вел марий ӱдырамаш Елена Сташкина дене пырля логалынна. Тиде шкешотан юзо ыле! Тудат презентаций годым марий тувыр дене лектын, но Мурманск олан чапшым арален, «Келшымаш мисс» титулым нале.
Конкурс мылам шкемым сеҥаш, шкалан да вийлан ӱшанаш, у йолташым муаш полшыш, чулымлыкым ешарыш, тӱням сӧрастараш шочмемым пеҥгыдемдыш. Ынде илышемын у томжым тӱҥалам да адакат шкемын сай койышемым кычалаш рат улам.
Курыкмарий улам
– Ты конкурс йолташ ӱдырем-влакын полышыштым шижаш да умылаш полшыш. Моско да Чебоксар гыч толыныт. А Курыкмарий район гыч Люба Ткаченко, Света Калинина, Агата Смирнова лийыныт. Вет илыш мучко нигӧлан эҥертыде гаяк ошкылам. Мый денем пырля кайыше да полыш кидым шуялтыше-влак улыт, мылам ӱшанат, ӧндалыт, саламлат… Тидыже моткочак шерге.
Ынде палем: еҥ-влак дене мутланыман, шонымаш нерген ойлыман. Конкурс ты шотышто виянрак лияш полша. Могай корно дене ошкылаш шоненам – шукталтын!
Сценыш лекмемлан ик татланат ӧкынен омыл. Курыкмарий вел вургемым чиен лектын, Марий кундем, шке район, ешем, шочмо верем дене палдарен кертмемлан куанем. Марий калык шке йӱлажым ок мондо, йылмыж дене кутыра. Мӧҥгыштем мыят эре курыкмарла мутланем.
Москошто илем да шӱм-чоныштем ешан да ава лияш шонымашым ашнем. Оҥай илыш корным эртенам: шонкалаш йӧратыше изи ӱдыр гыч нимом-нигӧм вучыде ошкылшо ӱдырамаш марте, кӧжӧ кая да шке ышта.
Рамкыш:
Молан йотэл гыч пӧртылмем нерген шукын йодыт. Каласем: мый шочмо элем йӧратем, тыштак ешан лийнем, йочам ыштынем. Тунамат кажне пел ий гыч ача-авам деке кудалыштынам, кызытат толде ом керт.
Рамкыш:
Мый палем: нимо деч лӱдман огыл, ӱмылыштӧ кодман огыл, тӱнялан шке чоным почман, поро лийман, шке нерген ойлыман, шочмо кундемым йӧратыман. Тыгаяк опытым кажне ӱдырамашлан эрташ тыланем: шкалан ӱшанен, шке шонымашдам шуктыза, сӧрал улмыда дене палдарыза.
Эльвира Терентьева.