17 ноябрьыште МОСИ-ште боевой искусство дене студент-влакын Российысе V форумыштым почмо. Тушко элнан 46 регионжо гыч 400 утла участник ушнен.
Форум кум кече шуйнен. Ты жапыште научно-практический конференцийым, айкидо спортым вияҥдыме шотышто онлайн-семинарым, карате, самбо, айкидо, кендо дене тренировкым эртарыме. Тидланже боевой искусство дене элнан вӱдышӧ мастар еҥышт дене пырля тунемме.
Палемдыман, форумым самырык-влакын пашашт шотышто федеральный агентстве, Марий Элысе Спорт да туризм министерстве, боевой искусство дене Российысе ушем, айкидо дене Российысе национальный совет полшымо да грант кӱшеш эртарат. 2023 ийыште ты проект кӱшыл шинчымашым пуышо тунемме тӧнеж-влак коклаште Российысе конкурсышто сеҥен.
Форумын икымше кечынже участник-влакым торжественно саламлаш боевой искусство дене Российысе ушемын Марий Элысе филиалжын президентше, Российын спорт мастерже И.А.Загайнов, спорт да туризм шотышто министр Л.А.Батюкова, Марий Элысе молодёжной политике комитетын председательже С.Ю.Игошин да молат толыныт.
Кум кече жапыште участник-влак тӱрлӧ мастер-классыште, тренировкышто, семинарыште, турнирыште мастарлыкыштым нӧлтен кертыныт. Форумын вес ойыртемже – научно-методический мероприятий-влак. Тыге, 17 ноябрьыште «Физическое воспитание молодежи и студенческий спорт в современном обществе: проблемы и перспективы развития, подготовка спортивного резерва» теме дене научно-практический конференций лийын. Тушто доклад дене ятыр еҥ выступатлен. Кажныже самырык-влак коклаште таза илыш-йӱлам шукташ кӱлмӧ, ӱдыр-рвезе-влакым спорт деке кумылаҥдаш кӱлмӧ нерген ойлен. Тидланже кундемыштына тӱрлӧ йӧн улмымат палемденыт.
18 ноябрьыште айкидо спорт дене регионысо федерацийым вуйлатыше да ты спортым вияҥдаш полшышо еҥ-влаклан «Истоки и перспективы развития Российского айкидо» онлайн-семинар эртаралтын. Тудым Российысе айкидо спортын национальный советшын полшымыж дене транслироватлыме. Тушто тыгак элыштына айкидо айкикай спортын кызыт кузе вияҥ толмыжо шотышто йодышым тарватыме да лончылымо.
Палемдыман тенийысе форум годым боевой искусство дене Российысе ушем да МОСИ пырля пашам ышташ келшымашым подписатленыт. Тыгак Йошкар-Олаште Нихон Будокай додзё дене отделенийым почмо нерген ойлымо. Тудым МОСИ пеленысе студент-влакын боевой искусство рӱдерыште эртараш тӱҥалыт.
Кум кече шуйнышо форумын лектышыжат куандарыше. Вет тудо элнан вӱдышӧ спортсмен ден тренерже-влакым иквереш чумырен. Пайдале мастер-класс, шонаш таратыше семинар, ойыртемалтше тренировко-влак. Форумышто лийше кажне участник шканже могай-гынат иктешлымашым ыштен. Тӱҥжӧ – спорт илышыште шонымашке шуаш кумылаҥдымым, характерым пеҥгыдемдаш, тӱрлӧ корштымашым да нойымашым сеҥаш полшымым умылен. Садлан боевой искусство дене заниматлыше спортсмен-влаклан форум кугу пайрем семын эртен.
Интернет гыч налме фото-влак.