Онкологий черан еҥ-влаклан писынрак полышым пуаш тӱҥалме дене кылдалтше у пунчалым лукмо.
Ынде врач-влак айдемылан, онкологий черан лийын кертмым палемдымекышт, кум паша кече жапыште консультацийым эртарышаш улыт. Тидын нерген Россий Правительстве у пунчалым луктын. Черлыеҥым тергаш кӱлешан инструментально-лабораторный исследованийым ышташ колтымеке, шым паша кечыште тудым мучашлышаш улыт. Диагнозым пеҥгыдемдат гын, черлыеҥым специализированно эмлалташ колташ, тыгак диспансерыште кум паша кече эскераш палемдыме.