Шочмо элым аралыше-влакын еш комитетыштын (КСВО) регионысо штабшым почмылан кум ий эртен. Йошкар-Олаште Калык-влакын келшымаш пӧртыштышт эртыше кечылаште тидын лӱмеш пайремле мероприятий эртаралтын.
Тушко специальный военный участник-влакын авашт да пелашышт, волонтёр, юрист, черкыште пашам ыштыше ден психолог-влак – фронтлан да салтак-влакын ешыштлан икымше кече гычак полшышо-шамыч толыныт. Уна-влаклан «Мы вместе! СВОя сила в искусстве» ончерым ямдыленыт. Тушко Российын тӱрлӧ регионжо да Марий Эл гычат СВО участник-шамычын аваштын, пелашыштын, ака-шӱжарыштын 30 наре пашаштым чумырымо.
– Кум ий пашам ыштыме жапыште те мер организацийыш веле огыл, герой-влаклан да нунын ешыштлан пеҥгыде эҥертышыш, ӱшаным да полышым пуышо верыш савырненда. Тиде кугу полыш да ӱшанле тыл. Тендан вий-куатда, пеҥгыдылыкда да мучашдыме ава йӧратымашда – мыланна пример. Пашада – Шочмо эллан служитлымаш. Тендан дене кугешнена, – ойлен Кугыжаныш Погын Председательын сомылжым жаплан шуктышо Лариса Яковлева да Кугыжаныш Погынын таумутан серышыжым специальный военный операций участник-шамычлан полшен шогымылан икмыняр еҥлан кучыктен.
Республикысе Правительстве, министерстве да ведомстве, мер организаций-влакын еҥыштат саламлымаш мутым ойленыт.
КСВО-н регионысо штабшым вуйлатыше Ирина Багаева паша лектышым иктешлыше докладым ыштен. Тачысе кечын штаб – тиде икоян команде, тушто юрист, психолог, волонтёр-шамыч да конфессий-влакын еҥышт полышым пуат манын палемден И.Багаева.
«КСВО Право» проект почеш 1,5 тӱжем наре йодмашым ончен лекме, 36 вашлиймашым эртарыме. Юрист-волонтёр-шамыч еш-влаклан квалификациян консультацийым пуат. Документым чын оформитлаш да кугыжаныш орган-влак дене кылым ышташ полшат. «КСВО Рядом» направлений шуко еҥлан чон эҥертышыш савырнен. Штаб республикысе чыла конфессий дене пырля пашам ышта. Психолог-волонтёр да полышым пуышо группо-влак ӱдырамаш-шамычлан ойгыштым сеҥаш да поро пашаш ушнаш кумылаҥдат. «СВОя СИЛА» да «СВОй путь» туныктымо проект-влак кризисный состояний гыч лекташ, илышыште у эҥертышым муаш полшат. Культурно-патриотический проект-влакат вияҥыт.
КСВО-н архивше гыч налме фото.