«Кидпашам ыштен пытарымеке, шӱм-чонышто куан шочеш», – тыге манеш Кужэҥер район Нурсола ялыште шочшо да кызыт Медведево посёлкышто илыше Светлана Токтарова (ӱдыр фамилийже Петухова).
Кызыт Светлана кок ийым эрталтыше эргыж дене мӧҥгыштӧ шогылтеш. Яра жап лекме годым тӱҥ шотышто изи чукайжым куандараш шонымаш дене кидышкыже тӱрлӧ тӱсан шӱртым налеш да сӧрал модышым пидеш я эше вес кидпашам ышта.
С.Токтарова шкеж нерген тыгерак каласкалыш:
Мый 5-ше класс марте Старсела школышто тунемынам, а 6-шо гыч 11-ше класс марте – Коҥганур школышто. 11-ше класс деч вара Марий кугыжаныш университетысе Аграрно-технологический институтышто «Продукты питания животного происхождения» специальность дене шинчымашым погенам. Вара 2016-2018 ийлаште тиде специальность денак магистратурыш тунемаш пуренам. «Марбиофарм» предприятийыште химический анализым ыштыше лаборантлан пашам ыштем. Авам пидаш шинчын гын, почешыже мыят шинчынам, авам тӱрлаш тӱҥалын – мыят, шӱртым, куэмым налын, воктекыже верланенам. Тидыже мылам эре келшен да келша. Эн ончыч курчакемлан вургемым пидынам, вара – шкаланем.
А модышым келыштараш тукым акаже Светлана Осинина (Юрьева) кум ий кумылаҥден. Тудын пидме кӱрен маска шӱм-чонжылан келшен: ты янлыклан озаже тувырым, капюшонан нарынче кофтычкым, пинеткым чиктен, а вуйышкыжо нарынче тӱсанак бантым келыштарен. Волгыдо тӱсан маска вес Светланамат шӱртан йомак тӱняшке ӱжын наҥгаен, да кызыт тудо яра жапшым лач тидлан пӧлекла. Женя эргыжлан кофтычкым, носким, комбинезоным, костюмым пидын чиктен. Тылеч ончыч пушкыдо пледымат келыштарен.
УМБАКЫЖЕ — «КУГАРНЯ» газетын 2 апрельысе номерыштыже.