Советский посёлкышто илыше Юлия 12 да 6 ияш икшывыже-влакым кужу жап мӧҥгыжӧ пӧртылтен кертын огыл.
Йоча-влак Одесса областьыште коча-коваж дене иленыт. Нуным шочмо суртышкышт кондаш ятыр чарак лийын, садлан Юлия Российысе айдемын праваже шотышто уполномоченный Т.Москалькова деч полышым йодын. Тыге Российысе да регионысо уполномоченный-влакын тыршымыштлан кӧра икшыве-шамыч авашт дек мӧҥгышт пӧртылыныт. Тидлан кужу корным эрташ пернен: Украине гыч – Молдова, Армений гоч Москош, тушеч – Йошкар-Олаш.
Ю.Зайцевын кӱштымыж почеш, Юлия дене пырля икшыве-влакым да коваштым Москош вашлияш Марий Эл Правительстве вуйлатышын алмаштышыже О.Бадма-Халгаева миен. Тудо кӱлеш документым оформитлымаште, лекше йодышым рашемдымаште полышым пуэн.
– Юлия Николаевна икшывыже-влакым мӧҥгыжӧ кум ий пӧртылтен кертын огыл. Ончыч пандемий тидым ышташ чаракым ыштен, вара военный действий тӱҥалын. Пашам пырля ыштымылан кӧра ава шке шочшыжо-влак дене вашлийын, – каласен О.Бадма-Халгаева.
Йочаже-влак да аваж дене вашлиймылан Юлия моткоч куанен да лишыл еҥ-шамыч дене иктеш лияш полшышо кажне еҥлан таушта.
Д.Речкинын фотожо.