Российысе «Это у нас семейное» конкурсын полуфиналышкыже Марий Элыште илыше кум еш логалын: Волков-Шаблиймыт, Григорьев-Козловмыт, Кожевников-Обуховмыт.
Ты конкурс еш, родо-тукым кокласе кылым пеҥгыдемдаш, йӱлам аралаш келыштаралтын. Тушко Юл кундем федеральный округысо регионла гыч дистанционный йыжыҥыш 1577 участник (368 еш) ушнен. Тушеч 78 команде конкурсын финалышкыже эртен. Финал 5-8 июльышто Моско олаште лиеш. Сеҥыше-влакым 8 июльышто Еш, йӧратымаш да ӱшанле улмо кечын палемдат. Кумло сеҥыше ешлан илыш условийым саемдаш вич миллион теҥгеаш сертификатым кучыктат. А 300 ешлан путёвкым пӧлеклат.
Марий Элысе Паша да калыкым социально аралыме министерствын сайтше гыч налме фото.