11-15 августышто Кабардино-Балкарийысе Нальчик олаште инвалид коляскыште улшо ӱдыр-влакын «Покорители Вершин-2024» моторлык да талант конкурсыштын финалышт эртаралтын.
Тушто Марий Эл гыч Марина Беляева, Наталья Ошаева да Анна Матвеева таҥасеныт. Нунылан организатор-влак мотивационный вашлиймашым, фотосессийым ямдыленыт.
Ӱдыр-шамыч ты конкурсыш логалаш Марий кундем нерген видероликым ямдыленыт. А таҥасымаште выступленийыштым шке калыкын вургемже дене ончыктеныт.
Марина конкурслан 20 корзиҥгам пидын да тушко пӱгыльмым оптен келыштарен, Марий кундемыште арама воштыр гыч арвер-влакым ыштылме нерген каласкален. Наталья «Чылдыртатыше кидшол» марий куштымашым ончыктен. Анна Анатолий Подольскийын «О, Марий Эл!» почеламутшым лудын.
А эн кугу куанымашым ӱдыр-влаклан Эльбрусым ужмышт конден. Нуно курыкым 3500 метр кӱкшытыштӧ канатный корно дене онченыт. «Мондаш лийдыме тат! Кӱкшытшӧ вуйлан пӧрдаш ситыше гынат, мотор! Мый курыкым моткоч йӧратем», – манеш Анна Матвеева.
Ӱдыр-влак конкурс гыч сеҥымаш-влак дене пӧртылыныт. Наталья Ошаевам «Мисс очарование» титул дене палемденыт. Анна Матвеевалан «Ончышо-влакын призыштым» да «Леди Стиль» лӱмым пуэныт. А Марина Беляевам «Леди Креатив» номинацийыште акленыт.
Эльвира Терентьева.
Фотом М.Беляеван альбомжо гыч налме.