Марий Элым Вуйлатыше Ю.Зайцевын Указше почеш «Сосновый бор» санаторийыште спецоперацийыш доброволец семын кайыше-влаклан сменым ышташ кӱштымӧ.
Кызыт тушко тазалыкым пеҥгыдемдаш кум доброволецым колтымо. Ветеран-влак эн неле ситуацийыште кучедалыныт, ятыр гана передовойышто колымаш ден илымаш коклаште лийыныт.
Мо оҥайже: кумытынат «Барс» добровольческий формированийыште пырля служитленыт. Санаторийыште нунылан массажым да гидромассажым ыштат, эмлыше тӱрлӧ ванным ямдылат, салтак-влак химават-терапий ден лазеротерапий курс-влакым эртат. Тыгак каныше-шамычлан спортивный тренажёр, ӱстембал модыш, мотор пӱртӱс да яндар юж улыт.
Фотом Интернет гыч налме.