Лач тиде гимн дене эртыше шуматкечын, 17 сентябрьыште, тӱҥалын Кукнур пайрем (Шернур районышто). Тений тиде мероприятий 29-ше гана эртаралте.
Ик жап тудо спорт шӱлышан лийын гын, кызыт – тӱрлӧ шӧрынан кугу пайрем. Тудлан негызым Валерий Мочаев ден Алексей Овечкин пыштеныт. Кызыт Кукнур землячестве, верысе администраций да калык полшат.
Тыште футбол, баскетбол турнир-влак, куржталмаш, кирам нӧлтымаш, шахмат дене таҥасымаш эртаралтыт. Тылеч посна ял калык ярмиҥгаш сатум ужалаш луктеш. Мутлан, шӧр-торыкым але шокшо мелнам налаш лиеш. Тыгак тӱвыра площадке уло. Тений игечылан кӧра тудо клубышто верланен ыле. Верысе калыкым Шернур посёлко гыч «Пӧлек» ансамбль, Кукнур кундемын коллективше да Киров кундем гыч «Лошкари» ансамбль куандареныт. Концерт деч ончыч «Когыльо пайрем» эртен. Озавате-влак тутло сийым ямдыленыт. Футбол турнирыш республикнан тӱрлӧ районжо гыч 12 команде ушнен. Икымше верыш «Кукнур-2» команде лектын. «Эн сай вратарь» лӱмым Павел Терехов («СКА») сулен. Эн сайын модшо семын Родион Глушковым («Кукнур-2») палемденыт.
Кирам нӧлтымаш дене Юрий Зонов лӱмеш таҥасымаш 19-ше гана лийын. Юрий Александрович кок ий ончыч илыш дене чеверласен гынат, родыжо-влак садак турнирым эртарат. Тений сеҥышыш Алексей Чимаев лектын, тудо вич минут жапыште кирам 128 гана нӧлталын.
Игече йӱран лийын гынат, ончышо-влакат, футболист-шамычат ятырын лийыныт. Тиде пайремыш толшо кажне еҥын кумылжым нимо волтен кертын огыл. Тек умбакыжат чаплана да тӱзлана Кукнур пайрем!
Фото ден видеом ВКонтакте соцсетьыште «Кугарня газет» тӱшкаште ончаш лиеш.