«Кугарнян» чапшым нӧлтен

Марий Эл  культурын сулло пашаеҥже Татьяна Иванова-Пчёлкинан 6 январьыште шочмо кечыже.  Ондакысе медицина пашаеҥ, тудо мемнан деке пашашке 2000-ше ийла тӱҥалтышыште толын. Тунамак тудо газетым лудшо-влаклан, почеламутым сайын возгалыше семын палыме лийын. Икмыняр жап гыч газет лаштыклаште тудын фамилийже дене республикынан илышыже, нунын калыкше, посна еҥышт нерген оҥай материал-влак лекташ тӱҥалыныт. Эн чотшо тудо ял калыкым пагален да районласе торарак яллашке миен лектеден. Мыят фотокорреспондент семын тудын дене пырля шуко верлаште лиеденам. Ваш кутырен келшен,  коктын, тӱрлӧ верла гыч ме шуко материаллам газетеш печатленна. Журналист семын тудо шке пашажым чот йӧратен, редакцийын заданийже-влакым жапыштыже шуктен. Калыкат тудым поэтессе, ятыр йӧратыме мурыштын авторжо семын  пален да  порын вашлийын. » Кугарня» газетын организоватлыме  калык дене вашлийме мероприятийлаштыже тудо чӱчкыдын  сай вӱдышыжӧ лийын. Тора верлаше: Урал , Пошкырт, Татарстан да моло верлашкат командировко  дене миен коштмо годымат, Татьяна шкенжым тыматле, газетын профессиональный пашеҥже семын ончыктен. Кызытат Татьяна, кеч мемнан дене пашам огеш ыште гынат,  шке творчествыже дене калыкым куандара.

Иван Речкин. Фотокорреспондент. Марий Элын культурын сулло пашаеҥже.

Журналист илыш гыч икмыняр фото-влак.