Ик ой дене ыштыме паша сай лектышыш конда, манеш марий калык. Лач ты амал дене Морко кундемыштына тӱвыра пӧрт ден школ-влак ваш келшен пашам ыштат, идалык мучко шуко мероприятийым пырля эртарат.
Шукерте огыл Шӱргыял школ ден Кораксола тӱвыра пӧрт Аван кечыжлан пӧлеклалтше чапле концертым шындышт. Тунемшына-влак ончылгоч концертлан ямдылалтыныт. Тидланже класс вуйлатышышт да музыкым туныктышо вуйын шогеныт.
Пайремым сӧрастараш Кораксола тӱвыра пӧрт пеленысе «Муро кумыл» фольклор ансамбльнат ушнен. Эн чолга мурызо Татьяна Эманова шкетынак икмыняр мурым ава-влаклан пӧлеклыш. Антонида Савинова жапше годым Шӱргыял школышто поварлан тыршен. Чыла туныктышо ден тунемше-влакат тудын муралтен колтымыжлан пеш йывыртеныт. Валентина Георгиевна Игнатьева (ансамбльнан эн ӱшанле да виян участницыже) СВО-што вуйым пыштыше Алексей эргыже да 19 ияш Егор уныкаж верч чонжо коржеш. Тудо ятыр поро тыланымашым каласыш. Д.Орайын «Чолга шӱдыр» повестьше гыч ава нерген ужашым лудын пуыш. Алексей эргыже лӱмеш возымо «Россий салтак» почеламутшым каласкалыш. Ансамбльнан гармоньчыжо, Ярансола ялын талантан эргыже Вениамин Андреевич Борисов нерген чыланат палат. Тудо гармоньжым шокталтен колта гын, чонет куана.
Тыге ме келшен илена, пашам ыштена. Самырык тукым ден кугурак ийготан-влак коклаште кылым пеҥгыдемденна. Тек ончыкыжымат Морко кундемыштына тӱвыра пӧрт ден туныктымо тӧнеж-влак коклаште ваш кыл виян лиеш. Лач тыге кушкын толшо тукымын чоныштышт икте-весым пагалымаш тул ылыжеш да волгалтын йӱла.
Елена Григорьева, Кораксола тӱвыра пӧрт вуйлатыше.
Снимкыште: Пайрем концерт годым.