Республикысе психоневрологический диспансерын амбулаторно-поликлинический отделенийжым у верыш кусареныт. Тылеч ончыч диспансер Йошкар-Оласе Прохоров уремыште верланен ыле. Но вер шагаллан кӧра черлыеҥ-шамычланат, медпашаеҥ-влакланат йӧндымырак лийын.
Йошкар-Оласе йоча эмлымверын восстановительный эмлымаш отделенийжым вес вере кусарымеке, олмышкыжо (Комсомольский урем) психоневрологический диспансерын амбулаторно-поликлинический отделенийым вераҥденыт. Эртыше кечылаште тушто Марий Элым Вуйлатыше Ю.Зайцеват лийын.
Тӱжем наре квадрат метр кумдыкышто кок регистратурым почыныт: кугыжаныш кӱшеш медполыш дене яра да оксам тӱлыман услуго-влак дене пайдаланыше-шамычлан.
Ончыкыжым кугурак ийготан-влаклан вуйдорыкысо когнитивный функцийым пӧртылташ полшышо «Ментальное здоровье» кабинетым, тыгак пужлышо аутический спектран йоча-шамычлан полышым пуышо Ресурсный рӱдерым почаш палемдыме.
Марий Элысе Тазалык аралтыш министерствын сайтше гыч налме фото.