Кугу вӱдшор лийшаш огыл

Йошкар-Олаште илыше да ятыр ий игечым эскерыше Геннадий Рыбаков март тылзым иктешла да апрель тылзе могай лийшаш дене палдара:

Пытартыш 100 ийыште Йошкар-Олаште мартысе игече 3 градуслан левештен. Пытартыш 40 ийым налаш гын, эн шокшо март 2008 ийыште лийын. Тунам 16 март гычак 5 градус шокшо шоген. А теве 2005 да 2018 ийлаште мартыште ик кечынат плюсан температур лийын огыл.

Тений 10 мартыштат эше 20 градус йӱштӧ лийын, 26 март гыч веле 4 градус шокшо шогаш тӱҥалын. Тений мартыште пытартыш 33 ийысе мартысе кокла температур деч 1,3 градуслан йӱштырак лийын. Лумат шагал огыл лумын, но пытартыш 29 ий жапым налаш гын, тенийысе март 7-ше верыш гына лектеш. Молгунам лум тылзе кыдалнак шулаш тӱҥалын гын, тений – 25 март деч вара гына.

Пытартыш шӱдӧ ийыште апрель тылзе 2 градуслан левештен. Пытартыш 38 ийыште кокла шот дене 1,7 градус леве шога. Тений 0,6 градуслан левырак лийшаш. Пытартыш жапыште апрельыште 1987, 1996, 1998, 2004 ийлаште йӱштӧ шоген, 1987 да 1996 ийлаште йӱдым эре минусан температур лийын, а 2004 ийыште кечывалымат термометрын столбикше 6 градус марте волен. 1998 ийыште эсогыл 19 градус йӱштӧ лийын. А тений эн йӱштыжӧ -2 градус лийшаш. Эн шокшо апрель 1990, 1991, 1995, 2001, 2012 ийлаште шоген. Южо ийынже юж 25 градус мартеат ырен. Тений апрельыште юж эн чотшо 12 градус марте ырышаш.

Апрельыште лумат лумеш. 1997, 1998, 2002, 2004 ийлаште лум шуко лийын. Пытартыш лу ийыште кокла шот дене тылзыште кум кече луман шоген. Тений кугу лум лийшаш огыл, йӱр йӧршан лум йоген кертеш.

Пытартыш кум ийым ончалаш гын, 2018 ийыште йӱран 9 кече лийын, 2019 ийыште – 5 кече, 2020 ийыште – 14 кече. А тений 9 кече йӱран лийшаш, кӱдырчымат вучыман. Моло кечын кече шыратен ончышаш.

Вӱдшор шотышто. Тений лум эркын шула, эн чот вӱд 15 апрельлан ташлен шушаш, но кугу вӱдшор огеш лий.