Венера ден Егор 4 ий келшеныт, ваш йӧратеныт. Когыньыштын йӧршеш кок тӱрлӧ койыш, но пырля иленыт. Венера – усталык кумылан айдеме, пушкыдо чонан. Тудо сӱретче. Сандене чылажымат шӱм вошт колта. А Егор – пеҥгыде койышан пӧръеҥ. Южгунамже туддене икойыш шуаш огеш лий, садак шке семынже ышта. Чоҥымо фирмыште инженерлан тырша.
Но ик кугу азап йӧратымашын чын тӱсшым почын пуэн. Икана Венера машина йымаке логалын, шуко вӱрым йомдарен. Тудым вашкеполыш машина дене реанимацийышке наҥагеныт. Егор эмганыше шӱмбел йолташыже пелен ик жап веле шинчен. Врач-влак деч Венера инвалид лийын кодеш манмым колын, рвезе таҥже деч трукышто шылын.
Тыгодым ӱдырым машина дене тӱкен кайыше пӧръеҥ, Михаил, чот тургыжланен. Азапыш логалмыжлан шканже шке верым муын огыл, Венера деке чӱчкыдын коштын, шерге эм-влакым наледен. Варажым ӱдыр коштын кертдыме лийын.
Илыш тыге савыралын: Михаил Венерам йӧратен шынден, нуно пырля ешым чоҥеныт. Пӧръеҥ пелашыжым операцийым ышташ вес эллашке коштыктен. Тыге ӱдыр эркын-эркын тӧрланаш тӱҥалын. Вич ий гыч сайын ошкылаш тунемын. Миша ден Венера мыняр йӧсым, нелым чытеныт гынат, вуйым шийын огытыл. Варажым кок эрган лийыныт, кугу олашке илаш кусненыт.
Илышыште тыгеат лиеш улмаш. Йӧратыме еҥ лӱдшӧ мераҥ гай кудалтен кая, а йылт ӧрдыжъеҥ эн лишылыш савырна.
Екатерина.
Моско ола.