30 майыште Э.Сапаев лӱмеш опер да балет академический театрын артистше-влак Москошто Кугу театрын сценыштыже икымше гана выступатленыт. Нуно шке визитный картычкыштым – «Хрустальный дворец» (А.Шор) балетым – ончыктеныт.
Театрын художественный вуйлатышыже, тӱвыра министр Константин Иванов соцсетьыште Кугу театрыште модмылан тауштен, поро шомакым Марий Элым Вуйлатыше Ю.Зайцевлан каласен. «Тиде кугу событий деке ме 24 ий каенна. Марий Элысе Профессиональный балетный школлан лач тынар ий темын», – манын возен К.Иванов.
Тыгак постановкым ончыкташ полшымаште Кугу театрлан да тудым шындымаште тыршыше чыла еҥым лӱмышт денак тауштен серыме.
Палыме журналист да амалкалче Елена Ищеева тиде событий нерген кугешнен ойла:
– Мыланем да йолташ ӱдырем-влаклан балет чонешна логалын. Чылажат келшен: костюм да декораций гыч тӱҥалын труппын кӱкшытшӧ марте. Балерине-влак йытыра улыт, солист – фееричный япон, оперный арий-влак Ла Скаласе гаяк шоктат, сценыште чыла ийготан йоча, имне, пий, кӧгӧрчен ылыч, да могай гына спецэффект уке?! Йошкар-Ола Москвам сеҥен налын. А Марий Элын тӱвыра министржын, сукалтен шинчын, Кугу театрын сценыжым кучымыжо чоным вургыжтарыш. Ты рыцарский жест постановкыж семынак – классический театрын эн сай да ойыртемалтше действийже.
Эльвира Терентьева.
Фото-влакым соцсетьла гыч налме.