Марий Элым Вуйлатыше Ю.Зайцев Российысе олимпийский комитетын директоржо В.Сенгелеев дене Марий Элыште Российысе да регион-влак кокласе таҥасымаш-влакым эртараш лийме шотышто мутланен.
Ю.Зайцевын палемдымыж почеш, кундемыштына кажне ийын кугу таҥасымаш-влак эртаралтыт. Тидланже регионын спортивный инфраструктурыжат начаржак огыл. Тачылан кундемыштына спортын 60 тӱрлӧ видше гыч 58 спорт федераций аккредитацийым эртен. Нунын кокла гыч 25-ше олимпийский радамыш пурат. Тылеч посна кундемыштына элнан сборный командыштыже шотлалтше тале спортсмен-влак илат.
2023 ийыште Марий Элыште Россий кӱкшытан 30, регион-влак кокласе 14 таҥасымашым эртараш палемдыме. Тушечын икмыняр дисциплиныже олимпийский таҥасымашыш пурышо спортын видше дене лиеш. Ю.Зайцевын палемдымыж почеш, Марий Эл Российын чемпионатшым, первенствыжым, кубокшым эртараш ямде.