Кугу сеҥымаш изи гыч лиеш
Российыште кажне ийын «Идалыкын ешыже» конкурс эртаралтеш. Тушто Марий Эл гычат еш-влак эре участвоватлат да тӱрлӧ номинацийыште сеҥышыш логалыт.
Тений Йошкар-Олаште илыше Зотовмытлан тыгай пиал шыргыжалын. Кум шочшан Анастасия ден Алексей Зотовмытым жюри «Самырык еш» номинацийыште ик эн ойыртемалтшылан шотлен. Нуным саламлаш Москошко ӱжыныт. Еш-влакын пайремышт да саламлыме церемоний тений 30 октябрьыште Кремльыште лиеш.
Манаш веле, ты конкурсышто 85 регион гыч 353 еш участвоватлен. А «Самырык еш» номинацийыште 71 еш лийын. Тынар ача-ава кокла гыч ончылно лияш?! Мо дене нуно жюрим сымыстарен кертыныт? 16 эн сай самырык еш радамыш логалше Зотовмытын еш илышышт нерген каласкалаш шонен пыштышна.