18 майыште Москошто «Россия сегодня» тӱнямбал мультимедийный пресс рӱдерыште «Лига Лекторов» кумшо тургымысо да «Школьная Лига Лекторов» икымше тургымысо конкурслаште сеҥышыш лекше-влакым палемдыме. Тыгай конкурс-влакым «Знание» Российысе Обществе эртарен. Нунын радамыште –Йошкар-Оласе коммерческий компанийын генеральный директоржо Татьяна Лебедева да Звенигово оласе 3-шо №-ан школышто тунемше Данила Морозов.
Нине конкурслашке элнан 36 регионжо ден 41 олаже гыч 50 еҥ да 20 икшыве ушнен. «Лига Лекторов» конкурсыш ушнаш манын, 1096 ола ден посёлко гыч 9174 йодмаш пурен. Сеҥыше-влак Красноярск, Моско, Беслан, Ижевск, Самара, Великий Новгород, Псков, Сургут, Саратов, Тверь, Краснодар, Новосибирск, Уварово, Долгопрудный, Вологда, Йошкар-Ола, Донецк, Пятигорск, Горловка, Ульяновск, Якутск, Грозный, Уфа да Озаҥ олала гыч лийыныт. Нунылан «Знание» Обществын лектор лӱмжым пуымо да уш-акылым пойдарыме элнан кугу организацийлаштыже эртыше мероприятийлаште участвоватлаш йӧным пуымо. Кажне 50 сеҥышылан 2,5 кило нелытан шунгит кубым, «Больше, чем путешествие» проект почеш канаш каяш сертификатым, тунемаш да шке проектым вияҥдаш 500 тӱжем окса пӧлекым кучыктымо.
«Школьная Лига Лекторов» конкурсыш 14-17 ияш-влак ушненыт. Тушко элнан 369 олаж ден посёлкыжо гыч 5003 йодмашым колтымо. Ончыл верыш лекше-влак Благовещенск, Кольчугино, Моско, Смоленск, Красноярск, Санкт-Петербург, Челябинск, Елец, Донецк, Краснодон, Каспийск, Звенигово, Новосибирск, Уфа, Озаҥ, Кемерово, Прокопьевск, Псков да Севастополь олала гыч лийыныт. Нунылан шунгит кубокым, канаш каяш сертификатым пуымо.
Сеҥыше-влаклан Россий Президент администрацийым вуйлатышын икымше алмаштышыже Сергей Кириенко, Российысе науко да кӱшыл образований министр Валерий Фальков, Российысе «Знание» обществын генеральный директоржо Максим Древаль наградым кучыктеныт.