«Кугу гастроль»

Йошкар-Олаште Кузбасс гыч Аркадий Гайдар лӱмеш Курчак театрын гастрольжо икымше гана эрта. Кемерово ола гыч курчак дене модшо артист-влак Марий Эл Республикысе курчак театрын сценыштыже руш калык йомак негызеш шындыме кум спектакльым ончыктат: «Финист – ясный сокол», «Крошечка-Хаврошечка» да «Летучий корабль».

«Финист – ясный сокол» спектакльыште чын да курымешлан кодшо йӧратымаш, тыгак ӱдырамашын подвигше нерген ойлалтеш. Спектакльым Москосо режиссер Валерий Баджи шынден. Йомакыште акрет Русь ончыкталтеш, декорацийлан пӱртӱсысӧ материал кучылталтын, а курчак-влак пу гыч ыштыме улыт.

Фотом https://vk.com/teatrkukolmariel соцкыл гыч налме.

«Крошечка-Хаврошечка» йомакыште изи ӱдыр нерген ойлалтеш. Тиде спектакль Курчак театр-влак кокласе «Вятка – город детства» фестивальыште (Киров, 2016) сеҥышыш лектын, тыгак «Золотая маска» фестивальыште (Москва, 2017) «Детский Weekend» программе конкурсышто ойыртемалтын.

Фотом https://vk.com/teatrkukolmariel соцкыл гыч налме.

«Летучий корабль» йоча да ача-ава-влаклан лирик сынан балаган. Тиде йомак поро Йыван рвезе нерген каласкалалтеш. Тудо поро шӱм-чонан да пеҥгыде койышан улмыжлан кӧра чоҥештылше пушым чоҥа, чын йолташым муэш да кугыжан ӱдырын чонжым савырен кертеш. Тиде спектакль Владимир, Барнаул, Красноярск олалаште ончыкталтын да чыла вере йоча да кугыеҥ-влакын чонышкышт логалын.

Фотом https://vk.com/teatrkukolmariel соцкыл гыч налме.

Нине кечылаштак (15-17 апрельыште) Марий Эл Республикысе курчак театр Кузбассыш кум йоча йомак дене «Айболит», «Колобок» да «Бука», кая.

Кузбасс курчак театрын спектакыльыштын ончыктымо кечышт:

15 апрель 18:00 шагат — «Финист – ясный сокол» (5+),

16 апрель 11:00 шагат, 17 апрель 11:30 шагат — «Крошечка-Хаврошечка» (4+),

17 апрель 16:00, 17 апрель 10:00 шагат — «Летучий корабль» (3+).