Кодшо шуматкечын Килемар районысо Арде селаште «Кугезе мланде» фольклор да этнографий фестиваль лийын. Тудо кок ий эртаралтын огыл ыле.
Калык усталык пайрем Кучмыж эҥер воктене кечыгут «лӱшкен», манаш лиеш. Тышке республикнан тӱрлӧ районжо, Угарман, Чуваший, Татарстан, Ямал-Ненец кундемла гыч кумло наре творческий коллектив толын. Нуно тошто марий илыш йӱлам почын ончыктышо номерла дене куандареныт. Пайремыш толшо кум тӱжем утла еҥ творческий студий, тӱрлӧ арверым ямдылыше да вургемым тӱрлышӧ мастерской-влакын сатушт дене палыме лийын да нуным налын кертыныт.
Тылеч посна тӱвыра да тоштер пашаеҥ-влак кудо-влакым ямдыленыт. Тудын гоч Килемар кундемыште кодшо курымышто илыше еҥ-влакын йӱлаштым, пайрем годым унам вашлийме тат-влакым ончыктеныт, тамле чес дене сийленыт. Казанеш шолтымо тутло кол шӱрымат еҥ-влак тамлен кертыныт. Тӱрлӧ мастер-классланат пайрем поян лийын.
Кастене пошкудо Алёшкино ялыште верланыше «Раздолье» туркомплексысе олыкышто Э.Сапаев лӱмеш опер да балет театр «Акпатыр» опержым визымше гана ончыктен. Кеҥеж кечын яндар южышто, декораций олмеш пушеҥге-влакым, олыкым, сцене семын эҥер серым йӧнештарен, спектакль пеш сылнын эртен.
Иван Речкин.
Авторын фотожо-влак.
