Кугезе йӱлам жаплена да аралена

Уло элна мучко 19 майыште Пионерийын кечыжым палемденыт. Поснак кугурак ийготан еҥ-влаклан тиде пайрем шерге. Лач ты кечын мыланна йоча жапыштышт эн ондак октябрёнокыш, вара пионерыш, а пытартышлан комсомолыш пуртымым шарналтен каласкалат. Таче Морко районыштынат чыла школыштыжак тиде пайремым огыт палемде. А Шӱргыял школыштына Пионерий кечым поснак вучена. Чумыр школ дене построенийым эртарена. Тушто кажне отряд вуйлатыше дружине председательлан рапортым пуа. Барабанщик-влак пайремым почыт, а вожатыйна Е.В.Григорьева пионерийын историйже дене палдара.

Теният 19 майыште Пионерий кечым палемдышна. «Рвезе тукым» йоча ушемнан гимнже почеш пайрем тӱҥале. 4-ше классым пытарыше 8 икшывым пионер радамыш пуртышна. Нуно чылаштын ончылно товатмутым ойлышт, «Взвейтесь кострами» мурым марла пеш сылнын йоҥгалтарышт. Нуным музыкым туныктышо Л.Н.Кириллова мураш ямдылен. Вожатыйна шкеак марла сценарийым возен.

Пионерийын кечыже моткоч веселан да куанлын эртен кайыш. Тек ончыкшымат тиде йӱла аралалтынак шога. Лач тыге ме, самырык тукым, икте-весым пагалаш да шочмо элым йӧраташ тунемын кушкына.

Дмитрий Егоров,

Морко район Шӱргыял школ пеленысе «Рвезе тукым» йоча ушемын дружине вуйлатышыже.

Снимкылаште: Пайрем годым.