Кугезе йӱлам жаплена да аралена

19 майыште Пионерийлан 100 ий теме. Таче Морко районышто чыла школыштыжак тиде пайремым огыт палемде. А Шӱргыял школыштына Пионерий кечым поснак вученна.

Пайрем «Рвезе тукым» йоча ушемнан гимнже почеш тӱҥале. «Йоча пагытын 100 тулотыжо» республикысе акцийыш ушненна. Кажне отряд шке мурыжым йоҥгалтарен. Пионерийын ветеранже Ольга Михайловна Александровам пайремышкына пагален ӱжынна. Шӱргыял школышто ятыр ий пионервожатыйлан тыршыше Ксенофонт Сергеевич Даниловым йоча-влак мӧҥгыжӧ саламлаш миеныт. Тудын сомылжым таче школыштына Елена Валериановна Григорьева шуя. Вожатыйна пионер атрибут дене ончерым сӧрастарен.

Тиде кечынак спорт таҥасымаш да тӱрлӧ модмаш эртаралтыныт. 4-ше классым пытарыше кок икшывым пионер радамыш пуртышна. Нуно товатмутым чылан ончылно ойлышт, «Взвейтесь кострами» мурым йоҥгалтарышт.

Вожатыйна марла сценарийым возен. Пионерийын 100 ияш лӱмгечыжлан пӧлеклалтше пайрем моткоч веселан да пӱтынек марла эртен.

Егоров Дмитрий, Шӱргыял школысо «Рвезе тукым» йоча ушемын дружине вуйлатышыже.

Снимкыште: пайрем годым.