Шукерте огыл Морко кундемыш Татарстан Республикын рӱдолаж гыч экспедиций дене Айсылу Гумерова толын. Тудо Озаҥ оласе Кугыжаныш консерваторийыште тырша: искусствоведений кандидат да Музык теорий кафедрым вуйлатыше.
А.Гумерова тӱрлӧ кундемыште лийын да калык пайрем йӱлам шымла. Ты гана Марий кундемышке толын, эн ончыч Морко мландым шымлаш шонен пыштен. Тыште Шеҥше, Кораксола, Мари-Кужер да Арын велне лийын. Илалше еҥ-влак дене кутырен, пайрем йӱлам да сӱаным эртарыме радамым йодыштын.
Кораксола ялыште «Муро кумыл» ансамбльын участникше-влак тошто муро-влакым йоҥгалтареныт, пайрем йӱлам каласкаленыт, шке кундемыште сӱаным кузе эртарен колтымым ойленыт да сӱан мурымат муралтеныт.
Елена Григорьева, Кораксола тӱвыра пӧрт вуйлатыше.