Тачысе саманыште кугезе йӱлам арален шогымашым ик эн кӱлешан пашалан шотлыман. А яллаште тиде сомылым илалшырак-влакак вел шуктен толын кертыт. Самырык тукым лач шинчаж дене эскерен, пример семын ушышкыжо да чонышкыжо вел шыҥдарен кертеш.
Кораксола кундемыште кугезе йӱлам арален толаш «Муро кумыл» фольклор ансамбльлан ӱшаныме. Садланак кажне пайрем годым ансамбльын чолга участницыже-влак марий йӱлам шуктат. Ӱярня пайрем кечын курыкышто мунчалтат, Кугече кечын отышко лектыт, лӱҥгалтыш дене лӱҥгалтат. Моло пайрем-влакымат палемдат. Тидлан верысе калыкат куанен мошта.
«Муро кумыл» ансамбльын чолга участницыже-шамыч верысе калыкым театрыш кошташат кумылаҥдат. Шукерте огыл М.Шкетан лӱмеш театрыш «Оръеҥ мелна» спектакльым ончаш миен толыныт.
Тыге кугезе йӱлам аралышаш верч уло вийна дене тыршена.
Елена Григорьева, Кораксола тӱвыра пӧрт вуйлатыше.
Снимкылаште: Кугече пайрем кечын, лӱҥгалтымеке, ансамбль каналта; М.Шкетан лӱмеш театрыште.