Марий Эл Российын изи кумдыкшым веле айла. Но тиде кундемын шке ойыртемже, поянлыкше да сылнылыкше улыт. А мо дене таче кечын республикна кугешнен кертеш? Ты йодышлан лудшына-влак вашештат.
Анатолий КУКЛИН, мурызо:
– Марий кундемна пашаче марий калыкын куатле ӱстел сийже, пайрем йӱлаже дене кугешнен кертеш! Изи улмем годым ялысе пайрем-влакым ужынам, шукыжым курымешлан шарнен кодынам. Теве, Коҥга пайремым налаш. Тиде пайрем кечын пошкудо ял гыч родо-тукым, имньым кычкен, унала толын. Гармонь сем, весела мурымаш да куштымаш! А ӱстелтӧрыштӧ могай гына тамле кочкыш уке! Уремыште йӱштӧ поран ӱштеш, а калыкын чоныштыжо – волгыдо кумыл. Чыла тиде – мыйынат йоча пагытем…