Альберт ВАСИЛЬЕВ, поэт:
– Марий Элна кундемыштына гына огыл, Российыштат палыме еҥ-влак дене кугешна, нунын коклаште композитор Андрей Эшпайым, киноактёр Йыван Кырлам палемден кодыман. Кугу Отечественный сарыште калыкна моло-влак дене иктӧр кредалын, 16 еҥлан Совет Ушем Герой лӱмым пуымо. Тидын денат кугешныман. Марий калыкын илышыже пӱртӱс дене кылдалтын. Куаныман, мемнан дене кугу чодыра, мотор ер ден эҥер, памаш-влак улыт. Ожно нуно калыкланна илен лекташыже полшеныт, кызытат поянлыкышт дене яллаште илыше еҥ-влаклан шийвундым ышташ полшат. Чаманен каласыман, республикыштына шуко ялозанлык пытен. Шукерте огыл гына курал-ӱдымӧ мландыште чашкер-влак кушкыт. Тачысе неле саманыште икмыняр предприятий гына йол ӱмбак пеҥгыдын шогал кертын. Туге гынат сатушт дене изи Марий Элнам Россий мучко чапландарат.