Анжела БЕЛКИНА, Ямал-Ненец АО-со «Губкинская неделя» газет
пашаеҥ:
– Мый марий ялыште шочынам, кушкынам, марий школышто тунемынам, шочмо сылнымутым лудынам да шкежат возенам. Школышто чолга улмемлан мыйым журналист-влакым ямдылыше йоча лагерьыш колтышт. Тунам икымше гана мыскылымым колынам: руш йоча-влак мыйын марий улмемым, рушла акцент дене мутланымемым воштылыныт. Икымше гана намысым шижынам. Кок ий гыч «Орлёнок» йоча лагерьыш логальым. Тушто, мӧҥгешла, йолташ-влак марий мут-влакым туныкташ йодыныт, мый марла муренам, шкенан делегаций дене марий тистым кугешнен нумалынам. Марий Эл деч тораште илыше-влак ӧрыныт, мемнан калыкна, йӱлана нерген палаш тыршеныт. Тунам мый изи республикнан вийжым, поянлыкшым ужаш да аклаш тунемынам.
Тылеч вара ынде 20 ий наре эртен. Ты пагытыште Марий кундем у сыным налын, ола-влак кушкыныт да шарленыт, марий тӱвырана иланен. Кызыт Интернетыште «Марла мутер» уло, ынде кумдан палыме еҥ-влак нерген Википедийыште лудаш лиеш, марий поп-муро толкын моткоч вияҥын, ятыр самырык поэт ден писатель кушкыныт, Марий республикысе университет-шамыч родо-тукым калык-влакын илыме элласе университетла дене кылым кучат. Калыкнан вераже – чимарий йӱла. Тудын шкешотан улмыжо, порылык да чынлык верч шогымыжо, кызытсе саманыште илен моштымыжо да вес вера-влак дене пырля тыныс илышым чоҥен кертмыже ӧрыктара.
Ме, марий-влак, шке калыкнам да чон куатнам арален коденна. Ме кӧ улмына деч вожылмым чарненна, шкенам у семын аклена. Кугезе вожнам монден, тӱвыранам томлен, шочмо йылмынам тунеммылан тореш лийын, иктаж-могай вес калык семын кояш тӧчен огына иле. Вет тиде – пундашдыме поргем! Ме тушко шуҥгалтме деч аралалтына. Тиде моткоч шерге. Теве мо дене мый кугешнем. Теве мо дене Республикна кугешнен кертеш!