Кугешнена, йöратена…

Марий Эл Российын изи кумдыкшым веле айла. Но тиде кундемын шке ойыртемже, поянлыкше да сылнылыкше улыт. А мо дене таче кечын республикна кугешнен кертеш? Ты йодышлан лудшына-влак вашештат.

Людмила СОКОЛОВА, У Торъял район, книгагудо пашаеҥ:

Марий Эл Республик мотор пӱртӱс, сылне вершӧр дене кугешнен кертеш. Кундемышкына турист-влак пеш шукын коштыт. Нунылан ончыкташ йӱлана, ерна, эҥерна, марий мончана-влак ятыр улыт. Йошкар-Олана моткоч вашталтын, сылнештын. Ынде марий калыкна нерген чыла вере палат, очыни. Университетлаште йотэл гыч толшо студент-влак тунемыт. Нуно марий йылмынам мокталтен колтат, могай ныжыл, шыма, муро гае йылме манын ойлен колтат. Тидыжым мый вес национальностян калык деч шуко гана колынам, да чонем утларак коршташ тӱҥалын. Ме, марий-влак, шочмо йылмынам огына жапле, огына тунем, ава шӧр дене толшо йылмына дене кугешнен огына мошто. Мутланен колташ ала-молан вожылына, икшывыналан шочмо марий йылмына дене мутланаш изинекак огына туныкто. Йочасадыште, школышто марий йылмынам сайын огыт туныкто да шагатшымат огыт пу…

Марий Эллан 100 ий темеш, тиде шукат огыл, шагалат огыл. Мыйын шонымаште, ме Марий улмына да шке Марий йылмына дене эре кугешнышаш, арален кодаш тыршышаш улына да тидымак шке йочана-влаклан шӱмаҥден шогышаш улына, шонем…