Ӱмаште 18 апрельыште сержант, взвод командирын алмаштышыже – гаубичный артиллерийский взвод отделенийын командирже Б.В.Бульченком Патырлык орден дене палемденыт (колымекыже). Тудо СВО-што шке порысшым шуктышыла колен. Йошкар-Олаште шочын-кушшо рвезе 27 ияш лийын.
Тений 18 апрельыште Йошкар-Оласе Т.И.Александрова лӱмеш 11-ше №-ан лицейын (Богдан Бульченко тиде лицейыште тунемын) Боевой чап тоштерыштыже Богданлан пӧлеклалтше «Твои герои, Россия» экспозицийым почыныт. Тудым чумыраш рвезын аваже Ольга Борисовна полшен. О.Б.Ваганова эргыжын документше ден чапкагазше-влакым, военный формыжым, гитаржым да моло арверым тоштерлан пӧлеклен. Экспозицийыште Б.Бульченкон шочмо нерген таныккагазшым, военный билетшым ужына. Туштак – рвезын тетрадьше-влак, тушко тудо канымыж годым тӱрлым возкален. Богдан изинек музыклан шӱман кушкын, поэзийым йӧратен, дзюдош коштын. Ятыр конкурсышто шкенжым терген, ончыл верышкат лектын – тидым дипломжо-влак пеҥгыдемдат.
– Богданым визымше класс гыч палем, класс вуйлатышыже лийынам. Мый тудым тыматле койыш-шоктышан, пырля тунемше ӱдыр-рвезе-влак дене кылым вашке муын моштышо, кугурак-шамычым пагалыше тунемше семын шарнен кодынам. Лицейыште тунеммыж годымак тудын пеҥгыде кӧргӧ вийже шижалтын, шындыме цельышкыже эре шуаш тыршен, – Б.Бульченком шарналтен каласкален туныктышо Ольга Ивановна Кривенок.
– Тиде экспозицийыште ик эн шерге экспонат – эргымын Патырлык орденже. Богдан поро, шке пашажым шот дене ыштыше лийын. Мый шкежат музыкым йӧратем, эргымланат тиде куснен – музыкальный школым пытарен, фортепиано классыште тунемын. Шуко лудын. Службыштат шкенжым шуарен: англичан йылмым тунемын, лудмо произведенийже-влаклан анализым ыштен, почеламут-влакым возкален, утларакшым – философий сынаным, – экспозицийым почмо годым ойлен Ольга Борисовна.
Мероприятийыш толшо-влак Богдан Бульченко нерген ятыр поро шомакым ойленыт да Ольга Борисовналан лӱддымӧ, патыр, Шочмо элын патриотшым ончен куштымыжлан тауштеныт.
Авторын фотожо.