Улам марий, Онар патыр,
Марий улмем дене кугешнем!
Тыге ик фотокартычке шеҥгелан Дальний Востокысо Еврей ОА-што Известковая станцийыште илыше Борис Герасимович Семёнов возен. Волжский район Пӧтъял ял шотан илемыш пурышо Кожласолаште шочын-кушшо пӧръеҥ ынде 50 ий наре шочмо кундемже деч ӧрдыжтӧ ила гынат, марий чон нигуш йомын огыл. Йошкар-Олаште Лесотехнический институтым (кызыт Волгатех) тунем лекмеке, направлений дене тора эрвелке логалын. Тунам аважлан мыскара йӧре «Тӱням ончаш каем» манын шыргыжалын, но тыге ойлымыжо курымашлык лийын.
Тушто Бурятий гыч тудын семынак направлений дене чодыра пашам ышташ толшо ӱдырым вашлийын, ешым чумыреныт, кум икшывым йол ӱмбак шогалтеныт, кум уныкашт уло.
Борис Герасимович кажне кечын родо-тукымжо дене марла мутлана. Икте-весе коклаште 8 шагат ойыртем гынат, тиде чарак огыл.
Йӧра, кеч телефон, Интернет улыт. Тений кеҥежым Зоя шӱжарже изажым куандараш шонен пыштен: Мӱндыр Эрвелке «Кугарня» газетлан подпискым ыштен пуэн. «Ну, куанен вет, – ойла Зоя Герасимовна. – Эре таушта.
Тудо вет тушто йӧршеш шкетак, нигӧ дене марла мутланаш. Кок ий ончыч унала миенам да мыняр газет мӧҥгыштем лийын, чыла тудлан намиенам. «Кугарням» тунам шер теммеш лудын». Вара ушыш шонымаш пурен: изалан подпискым ыштен пуаш…»
Но тудо жапыште тыгай йӧн лийын огыл. Тений «Ынде «Кугарням» Камчатка гыч Калининград марте налаш лиеш» манмым колмеке, Галина Герасимовна вигак почтыш каен.
Китай чекыште илыше марий пӧръеҥын тайгаште шке чодыраже уло, тушто эн ончыч мончам чоҥен шынден. Мӱкшым онча, колым кучаш йӧрата, сонарыш коштеш. Марий Элыш илаш ӱжыныт, но тореш лийын. «Мый ынде Тайга деч посна иленжат ом керт» манын. Зоя Герасимовна воштылеш:
«Ну, оҥай илат вет. Курыкан мотор вершӧр. Газ уке. Телым вӱд уке – кажне кечын машина дене пӧрт деке печке дене вӱдым шупшыктат. Мый тушеч кедр пушеҥгым
конденам».
Борис Герасимович, ме Тыланда Марий Эл гыч, «Кугарня» газет редакций да тендан родо-тукымда, йолташда-влак лӱм дене кугу саламым каласена! Палена, кызыт те тушто, Марий Эл деч 7500 меҥге тораште, газетым кидыш кучен лудыда. Таза лийза!
Владимир АПТУЛАЕВ.