«Шулдыран пагыт» лаштыкна Морко районысо Кокласола лицейыште тунемше чолга ӱдыр Аделя Герасимова дене палымым ышта. Тудо кызыт Саранскыште «Большая перемена» конкурсын полуфиналыштыже участвоватла.
Вес лаштыкыште лагерьыште каныше да «Ералашыште» модшо ӱдыр-влак дене палдарыме. Тыгак Кужэҥер районысо Топкавлак ялысе рвезе-влакын «Акула» вӱдйымал пушын морякше Сергей Макеев дене вашлиймыштым, тӱрлӧ йодышлан вашмутым муымыштым каласкалыме.
Ик страницым Йошкар-Олан лӱмгечыжлан пӧлекленна, ятыр фотокартычкым вераҥденна. А «Шочмо кундемнам шымлена» лаштык Йошкар-Оласе кӱвар-влак да У Торъял район Макмат ял дене палдара.
«Олимп» лаштыкыште Российысе латкумшо ялысе спорт модмашын финалыштыже лийше да личный первенстыштыже шӧртньӧ медальым сеҥен налше Матвей Смирнов да тудын ешыж нерген каласкалыме. Молан ешыж нерген маныда? Вет Елена пелашыжат тушто таҥаса. Мемнан корреспондентна Елена Годунова спорт шӱлышан ешын кузе тыгай сай результатыш шуын кертмыж нерген рашемден.
«Кузе илет, эрвелмарий?» лаштыкыште Пошкырт кундемысе Шаран посёлкышто илыше марий еш Миндияровмыт нерген ойлалтеш. Ты лаштыкыштак тиде Шаран районысо Янахмет ял шукерте огыл 260 ияш лӱмгече пайремжым эртарыме нерген возенна.
Шушаш номерыште лудшо-влакын ик эн йӧратыме лаштыкыштат уло — «Изи тӱня, кугу тӱня» лаштык. Редакцийышкына еҥ-влак шкешт дене лийше историйым возен колтат. Ты гана кӧраныше йолташ вате ден тоштыеҥ дене кылдалтше да моло историй-влакат савыкталтыныт.
«Сылнылык тӱня» лаштыкна Шкетан лӱмеш театрысе у тургым да 25 августышто лийшаш ик премьерже нерген радамла.
«Илыш мундыра» лаштыкыште ятыр пӱсӧ йодышлан вашмутым муын кертыда. Моло лаштыкыштат увер да кӱчык заметке ятырак. Лудаш ида ӧркане гына!